Nereqatigiittarneq inuttut nukittorsaatigisarpaat
Kalaallit inuuniarnikkut ajornartorsiuteqartut, Københavnimi Mozart Pladsimi sapaatip akunneranut ataasiarlutik igaqatigiillutillu nereqatigiittarput. Nereqatigiittarfik taaguuteqartinneqarpoq Kalaaliaraq.
Allattoq Louise M. Kleemann
marsip 29-at 2011 16:07
Taamatut aaqqissuussineq Københavnimi Kalaallit Illuutaat peqatigalugu 2006-imi pilersinneqartoq, atuisunut akisussaaffeqarnermik misigisimanermik aammalu kalaallit akornanni ataqatigiinnerulernermik kinguneqartartoq, Københavnimi Kalaallit Illuutaanni sulisoq, aqqusinermilu kalaallinik sullissisoq, Agga Petersen oqarpoq.
- Kalaallit silami Mozarts Pladsimut orniguttartut amerlanerit atugarliortuupput, Agga Petersen oqarpoq. Nereqatigiittarneq inuttut ingerlariaqqinnissamut nukittorsaataasartoq Agga Petersenip oqaatigaa.
- Malunnartarpoq imminnut paarinerulertarnerannik kinguneqartartoq. Aamma silamiippallaarunnaarlutik imminnut pulaaqattaarnerulertarput, Agga Petersen oqarpoq.
