Neqitsersuiniarnertik amigartoorutigaat
Ukioq manna issinerujussuani Ilulissani ningittagarsortut umiatsiat, 30-it missaani amerlassusillit ningittagarsornermi atortuminnik aasiiniarlutik neqitsersorniarlutillu imminnut utaqqisaqattaatingaatsiartarsimapput..
Containerit neqitsersortarfissiat 20 fods missaanik angissusillit marluusut, taamaallaat aappaa kiassagaavoq, imeqaratik, anartarfeqaratik igalaaqaratik silaannarissarfeqaratillu.
Ilulissani kommunalbestyrelse 2008-mut aningaasanut missingersuummi 1 million koruuninut neqitsersortarfissamut amernik tunioraaviutigisussamut illikartitsisimasoq kommunaldirektør Hendrik Rafn oqarpoq.
Pilersaarusiaq upernaamut aallartissooq, taavalu aasaanerani aningaasartassavii aaliangiunneqarpata aallartinneqassalluni.
Ilulissani aalisartut neqitsersorniarlutik utaqqisaqattaannerup saniatigut ukioq manna sikuartarnerani ataannartumik aalisarsinnaasimanngillat.