Neqi suli utaqqivoq

Kommune Kujallermi borgmesterip Simon Simonsenip Narsami neqilerivissaq utaqqikatalluinnarpaa, tamannami Naalakkersuisut ataasiaratik ataatsimiinnerni Kujataanullu tikeraarnerminni neriorsuutigisarmassuk. Siorna ukiakkut juullertinnagu aalajangiisoqarnissaa neriorsuutigineqarpoq. Maannamulli suli aalajangiisoqarani, kinguartitsisoqaqattaartuarpoq, borgmesteri Naalakkersuisunut ammasunik allakkamini ilaatigut taama allappoq.

Tamanna Kujataamiut ingammillu savaatillit qatsulluinnarpaat.

Savanik toqoraanissaq piffissami qanittumi pisussaavoq, savaaqqallu 25.000-it toqorarneqartussaallutik.

Neqilerivik aserfallassimaqisoq toqoraavittut akuerineqarsinnaaniassammat ukiorpassuanngortuni millionilikkaanik aningaasaliiffigineqartarpoq. Tamakku asuli iluarsiinerinnaasarput - sunaluunniimmi qalipapalaaginnarlugu nutaanngornavianngilaq, Simon Simonsen allappoq.

- Asasavut Naalakkersuisut, qanoq sivisutigisumik utaqqissaagut qanorlu sivisutigisumik inuussutissalerinikkut anguniakkasi ajunngitsut tatigalugit utaqqissanerpavut. Kujataa inuussutissalerinikkut inissisimalluareerpoq, inuussutissalerinerlumi Kujataani Nunap Immikkoortuinik Ineriartortitsinermi suleriaasissanut ilaavoq.

Savaateqarneq nunalerinerlu Kujataani qangaaniilli tulluusimaarutigalugit ingerlataraavut aamma ilinniarfiit Inuili, ATI aamma Upernaviarsummi misileraavik pigalutigik, borgmesteri erseqqissaavoq.

Aamma inuussutissalerineq Kujataani ineriartorteqqinneqassappat, Narsami neqilerivik qitiulluinnartumik inissisimavoq.

- Tunisassiat suliarineqartariaqarput ineriartorteqqinneqartariaqarlutillu, inuussutissalerinermillu suliaqartut tamarmik ilisimavaat, aningaasat suliffissallu suliareqqiinermi pineqarmata.  Neqi siunissami neqilerinissaminut piareersimalluarpoq. Neqilerisutut ilinniartut aqqaneq marluk suliffeqarfimmi siorna aallartipput, neqilerisunngorniartullu atuaqatigiit suli allat aallartineqarnissaat kissaatigineqartorujussuulluni.

- Alloriaqqinnissatsinni utaqqiinnakkavut tassaapput Naalakkersuisut. Aamma Neqi  aningaasaliisoqarnissaanik qinnuteqanngilaq, aningaasanik atukkerneqarnissaminik taamaallaat qinnuteqaateqarpoq, borgmester Simon Simonsen ilanngullugu taama allappoq.