Neqi A/S matuneqariaannaavoq

Kiffartuussinissamut isumaqatigiissut aqqutigalugu, Neqi A/S, piginnittunit, tassalu Namminersornerullutik Oqartussanit, 4 millioni koruuninik aningaasaliiffigineqanngippat matussasoq, KNI A/S-ip Neqi A/S-illu siulersuisuisa kingusinnerpaamik julip ulluisa 15-ianni aalajangertariaqassagaat, Neqi A/S-ip siulersuisuini siulittaasoq, Hans Noahsen, oqarpoq.
juunip 13-at 2008 05:35

KNI A/S-ip siulersuisuisa marlunngormat Kangerlussuarmi ataatsimiinneranni tamanna aalajangiunneqarpoq.

Kiffartuussinissamut isumaqatigiissuteqartoqarnissaa kingusinnerpaamik julip 15-ani Naalakkersuisut aalajangiuppassuk, suliffeqarfiup ullumikkutut ingerlaannarnissaa suli neriuuteqarfigalugu, Neqi A/S-ip siulittaasua oqarpoq.

Suliffeqarfik, nerisassanik nioqqutissiortut allat assigalugit, innaallagissamut imermullu akikillisaavigineqartartuuppat, kiisalu illutaa atortullu pisoqalisimaqisut aaqqinneqartuuppata, amigartoorutit ikinnerussagaluaqisut ilanngullugu oqaatigineqarpoq.

Neqi A/S 3,7 millioni koruuninik 2007-imi amigartooruteqarsimasoq missingersuutit takutippaat.

Sinneqartooruteqarluni ingerlalissappat periarfissat allat tassaagaluarput savaaqqat nioqqutissiarineqartut 24.000-inik amerlanerunissaat, imaluunniit savaaqqat savaatilinnit pisiarineqaraangata 12- 13 koruunit angullugit kiilumut akikillinissaat, imaluunniit savat neqaat pisiniarfinni akitsuiffigalugit.

Taakkulu kikkut tamarmik orniginartinnavianngimmatigik piviusorsiortutut isigineqanngitsut, Neqi A/S-ip siulersuisuini siulittaasoq, Hans Noahsen, oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq