Neqi A/S-ip matusariaqarnissaa KNI-mit aarleqqutigineqarpoq
- Nalunaarutigineqartoq nutaajulluinnarmat, qullersaqarfitsinni qanoq iliornissatsinnik aalajangertinnata, suliareqqaassavarput, KNI A/S-ip pisortaanera Søren Lennert Mortensen oqarpoq.
- Savanik toqoraavik matuneqarpat, imaanngilaq savaatillit tunisassiorsinnaajunnaassasut aningaasarsiorunnaarlutillu, naliliivoq.
- Namminersornerullutik Oqartussat toqoraavinnik angallattakkanik pilersitsinissaq eqqarsaatigaat, imaluunniit aamma toqoraavimmik pisiumasunik nassaarniassallutik, Søren Lennert Mortensen oqarpoq.
Savanik toqoraavik piffissami sivisuumi amigartooruteqarluni ingerlavoq, ukiuni kingullerni pingasuni savanik toqoraavik katillugit 20 millioni koruunik amigaartooruteqarluni.
KNI-p aningaasaqarneranut sunniuteqarnerluppoq, tamanna KNI-p ukiumut nalunaarusiaani siorna saqqummiunneqartumi erserpoq.
Nalunaarusiami tassani KNI allappoq, KNI-mi ataatsimeersuartoqarnerani piumasarineqartoq, Neqi A/S-ip tuniniarneqarnissaannik periarfissanik misissuisoqarnissaq. Tamannali kiffartuussinermik isumaqatigiissuteqarnikkut taamaallaat pisinnaasimavoq, kiffartuussinissamillu isumaqatigiissuteqarniarneq itigartitsissutigineqarpoq.