Nepalimi qinersineq eqqissisimavoq

Qinersineq Nepalimiunut pingaaruteqartorujussuuvoq tunngaviusumimmi inatsiliortussat qinerneqarmata. Ukiuni kingullerni qulini Nepalimi najummassimanartunik pisoqartuarnera maanna unitsinneqassasoq neriuutigineqarportaaq.

Peter Erten, Nepalimi naalakkersuisunut siunersortaasoq oqaluttuarpoq, aporaattoqatsiartaraluartoq ilimagisamiit eqqississimanerujussuarmik qinersineq ingerlanneqartoq. Qinersiviit 9800-t ilaat 33-t qinersiffigineqarneri atortinneqassanngillat ullunilu tulliuttuni taakkunani qinerseqqittoqartussaassaaq, taakkualu ilimagisamiit ikinnerupput.

Taasinerit maanna kisinneqarnissaat tullinnguuppoq nunamilu qaqqartuumi taasinerit angallanneqartussaammata qinersinerup inernera sapaatip akunnerinik marlunnik sivisussuseqassangatinneqarpoq. Kisitsinerlu naammassereerpat inatsisartunut ilaasortanngortut inatsisartutut suliutigalutik tunngaviusumik inatsisissat pilersinniartussaavaat. Aaqqijagiinnginnerit unitsinneqarnissaat neriuutigineqarpoq, Kommunistillu Maosiortut pikitsitsiniarunnaarnissaat pingaarnertut neriuutigineqarpoq, taakkuami ukiuni 13-ini pikitsitsiniarnikkuupput. Taasinerilli kisinneqalerpata eqqissiviilliortoqarsinnaanera ilaatigut ilimagineqarpoq, qinigaanngitsoortummi imaassinnaammat ajuallattalerunik eqqissiviilliortitsiniartalersut.

Qaqugorpiaq kisitsineq naammassineqassanersoq suli nalunaraluartoq ilaannit oqaatiginiarneqarpoq qaammammik ataatsimik sivisussuseqarsinnaasoq.