Nelson Mandela toquvoq
- Eqqissivoq, nunatta ernerata toqukkut qimappaatigut, Zuma aliasulluni oqarpoq.
Nelson Mandela Afrika Kujallermik allanngortitsilluinnartoq 95-inik ukioqarluni toquvoq. Sivisuumik napparsimareerluni sisamanngormat unnukkut Johannesburgimi angerlarsimaffimmini eqqissivoq.
Præsidentiusimasup Nelson Mandelap ikinngutai ilaqutaalu kiffaanngissutsimik ilungersuuteqartup angerlarsimaffiani sisamanngormat katersuupput, nutaarsiassaqartitsivik AFP taama allappoq.
Nelson Mandela imaannaanngitsumik inuuneqarsimavoq.
Politikkimik aallutaqarnini ukiuni 15-ini kiffaanngissutsimik ilungersuuteqarluni aallarnerpaa, kingorna apartheidimik aqutsinerup nalaani ukiuni 27-ni parnaarussaaqqavoq, iperagaanermilu kingorna Afrikami Kujallermi qeqertumik amillit siullersaattut ukiuni tallimani præsidentiulluni.
Taava hiv-mik aids-millu akiuiniarneq nunarsuarmi siuttuuffigilerpaa, aammalu Afrikap nunavissuani akerleriinnerni isumaqatigiissitsiniarnermik eqeersimaartumik suliuteqartarluni.
Afrika Kujallermi ammip qalipaataanik immikkoortitsilluni apartheidimik aqutsisoqarneranut ilungersorluni akiuunnini Mandelap sapiitsuliortutut nunarsuarmi tamarmi ataqqinaatigilerpaa. Tamat oqartussaaqataanissaannik ilungersuuteqarnini pissutigalugu inersimasuunermi annersaani parnaarussaaqqavoq.
