NBC-ip nunarsuup kiatsikkiartornera aallakaatinniarpaa

Aallakaatitassiortartoq ataaseq, assiliisartoq ataaseq nipilerisoq ataaseq ikiortaallu arlallit teknikkikkut atortunik karsinik 20-nik nassarlutik sapaatip akunnerata naanerani Nuummiipput tv-kkut aallakaatitassamut immiussiartorlutik.

Tamatumunnga pissutaavoq NBC nunarsuup kiatsikkiartornera pillugu toqqaannartumik aallakaatitsiniarmat. Matumani samminiarneqarlutik nunarsuatsinni malunniuteqarnerpaat, tassaasut Amerikami Kujallermi orpippassuaqarfiit, Sikuiuitsumi Kujallermi ilisimatusarfiit aamma soorunami nunarsuup kiatsikkiartorneranut atatillugu soqutigineqarnerpaaq Ilulissat Kangerluat Kangia. NBC-p aallakaatinniagaa novembarip tallimaani arfernannilu aallakaatinneqassaaq. NBC ulluinnarni aallakaatitsigaangami 3,6 miliuuninik isiginnaartoqartarpoq.

NBC-p Nuummi filmiliariniarpai peqatigiiffik qajaq, erinarsoqatigiit N.I.P.E, golfertartut peqatigiiffiat aamma Nuup eqqaani pinngortitaq.