Sorsunnersuup aappaani SS aqqutigalugu pinerluuteqarsimasoq Søren Kam ukiorpassuarni Tysklandimi illersugaalluni inuuvoq.
Maannali kiisami neriunartoqalerpoq nazistitoqqap taassuma 1943-mi inummik toqutsisimanera pillugu Danmarkimi eqqartuussaanissaata Tyskit oqartussaasuinit kiisami akuerineqarsinnaalernissaa.
Taamanikkut sorsunnerup nalaani Søren Kam-ip nazisteqatini peqatigalugit aviisimi aaqqissuisoq Carl Henrik Clemensen toquppaat. Taamanimiillu Tyskinit illersorneqalerpoq, oqaatigineqartarluni Tyskisut innuttaassuseqarmat suneqassanngitsoq.
Tallimanngormalli Tyskit inatsisiliortuisa akuersissutigaat europa-mi parnaarusseqqusinermik malittarisassat naapertorlugit suliaq ammaanneqassasoq inuartorlu taanna nunanut EU-mut ilaasortaasunut tunniunneqassasoq.
Taamalu maanna neriuutigineqalerpoq, nazistitoqaq eqqartuussivitsigut sorsunnermi pinerluuteqarsimasutut malersorneqalissasoq.
Angutillu taassuma ernerata Peter Bach-ip aammattaaq neriuutigaa angunni danskit oqartussaasuinit eqqartuunneqassasoq.
- Arlaannarpulluunniit akiniaarusunngilaq, akerlianilli naapertuilluarneq pisariaqarpoq, pineqartup ernera Ritzau-imut taama oqarpoq.