Nawaz Sharif akunnerit sisamat Pakistanimiillatsiarpoq

Nawaz Sharifip ukiamut Pakistanimi præsidentimut qinersisoqalerpat, maanna præsidentiusoq Pervez Mussharaf unammillerlugu qineqqusaarniaraluarpoq, tamannali piviusunngunngitsoorpoq.

Nawaz Sharif ullaaq Islamabad-ip mittarfianut tikimmat, timmisartua sakkutuunit qernertunik atisalinnit akunnerup affaanik sissuerneqarluni unguneqarpoq.

Nawaz Sharif tapersersortinilu timmisartumiit nioqqusaagamik, mittarfiup inuit akimasut isersimaartarfianut iseraluaannaq tigusaavoq, megafonikkullu Nawaz Sharif Saudi Arabiamut anisitaanissaa peqqussutigineqarluni.

Nawas Sharif-ip Pakistanimit anisinneqarnera illersortaanit akerlilerneqarpoq, Illoqarfimmilu pingaarnermi Islamabad-imi Nawaz Sharifimik illersuisut præsidentillu sakkutuuisa akornanni eqqissiviilliornermik kinguneqarpoq.

Nawaz Sharif Pakistanimi ministeriunertut tassanngaannartumik Pervez Musharrafimit 1999-imi uppitinneqarpoq, Musharraf siuttuliullugu sakkutuut pissaanermik tigusimmata, 2000-imilu Sharaf Pakistanimit nunanut allanut qimaasitaavoq.

Pakistanimi eqqartuussivik ukioq kingulleq aalajangerpoq Sharif Pakistanimut utersinnaasoq, tassanngaanniillu Sharif Pakistanimut allagarsiisalerpoq nunaminut uterniarluni, Præsidentimut qinersisoqalerpat Musharraf unammillerniarlugu.