Nattorallik niaqoqaranilu isigaqanngitsoq siumorneqartoq

Angerlarsimaffinni eqqissiviilliornerit amerlasuut, tillinniarnerillu aamma amerlasuut, Sermersuup politiivinut sapaatip akunnerata siuliani nalunaarutigineqarsimasut, Sermersuup politiivisa nalunaarutigaat, soorlu aamma nattoralik toqungasoq, niaqoqaranilu isigaqanngitsoq siumorneqarsimasoq nalunaarutigineqartoq.
Allattoq Mads Lynge
februaarip 24-at 2014 09:47

- Pisuttorniarluni pinerluttuliornerit katillugit 32-t nalunaarutigineqarsimapput, nalunaarutigineqartartunit ataatsimut isigalugu amerlanerullutik, Sermersuup Politiivini vicepolitikommissæri Mikael B. Kofoed, tusagassiuutinut nalunaarummi ilaatigut allappoq.

200 koruuni peqquserlulluni aningaasaliarineqarsimasoq, GrønlandsBankenip aningaasanik uninngasuutimik kisitsinermini ilaatigut aamma siumorsimavaa.

Angallammi atortut assigiinngitsut, VHF-radiolu Icom M421-mik meqqilerneqarsimasoq, tillinneqarsimasut aamma nalunaarutigineqarsimavoq, innuttaasullu tamanna pissutigalugu eqqumanissaat Sermersuup Politiivisa kajumissaarutigaat.

Tamaani politiit aamma allanalaartumik aamma nalunaaruteqarfigineqarsimapput, tassami nattoralik toqungasoq, niaqoqaranilu isigaqanngitsoq, Nuup kujatinnguani Qarajat Iluanni immami puttasoq, Namminersorlutik Oqartussanut Pinngortitaleriffimmullu nalunaarutigineqarsimagami.
Inuillu pisimasumut tunngatillugu ilisimasaqassagunik, Sermersuup Politiivinut nalunaaruteqarnissaat, Sermersuup Politiivisa kajumissaarutigaat.

Sermersuup Politiivisa normoraat 70 14 48.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq