NATO-p Rusland oqaloqatigiumavaa
Siooranartut ajornartorsiutillu ataatsimoorussat akiorniarlugit russinik suleqateqarnissap pilersinnissaa ornigigini ullumi Tuluit aviisiannut Financial Timesimut oqaatigaa.
Foghip oqaatigaa sinniisuutitanik qaffasissunik Ruslandimut aallartitsiniarluni, matumani NATO-p ineriartornera suleqatigiissinnaanermullu periarfissat Kremlimit qanoq isumarfigineqarnersut paasiniarneqassallutik. Ruslandip namminerisaminik sillimaniarnikkut pisariaqartitai NATO-p aamma akuerisariaqarai oqarpoq. Maannalu oqarasuaatikkut oqaloqatigissavarput NATO pillugu immikkut ilisimasalik Kristian Søby Kristensen qallunaat sakkutooqarnermut ilisimatusarfianni ilisimatusartoq.
NATO-p Ruslandillu oqaloqatigeeqqilernissaannut tunngavissamik takusaqarsinnaavit?
Aap taama oqarsinnaavunga, ilaatigut oqaatigineqareersunut Fogh ilaliivoq tassami Obamap nutaamik aallartinnissaq ujartornikuuaa, matumani nunat killiit Ruslandimut ataatsimut isigalugu attaveqarnerat taakkartorlugu. Taamaammat Ruslandimik oqaloqatiginninnissap sioqqutsisumik aallartinnissaa piffissami sivisujaami isumaliutigineqarsimavoq.
Periuseqarnikkut pimoorussisumik Ruslandimik suleqateqarnissaq Anders Fogh Rasmussenip isumaliutersuutigalugu eqqaammagu, sukkununa ataatsimoorussatsinnik soqutigisaqartugut?
Matumani oqartoqarsinnaavoq, Ruslandip NATO-llu ataatsimoorussamik soqutigisaat tassaasut, pingaarnertut isigalugu inatsisinik malitsitsiniaanernik taaneqarsinnaasut, toqqissisimanermik qulakkeerinerit aammalu assersuutigalugu pinerliiniartartunik, imaatigut ujajaaniartartunik akiuinerit kiisalu sakkussiarsuarnik siammarterinnginnissaq. Taamatuttaaq Afghanistanimi aammalumi Kangia Qiterleq ataatsimut isigalugu ajorpallaanngitsumik ingerlanissamik qulakkeerinissaq matumani pingaarnertut soqutigisatut taaneqarsinnaapput.
