NATO-p Afghanistanimi sorsoqataanera oqallissutaavoq

NATO-p Lissabonimi ullumi ataatsimiinnerani oqaluuserineqartut pingaarutillit ilagaat Afghanistanimi sorsunneq.

Sorsunnerup sakkortunerpaaffini tikikkallarsimavaa NATO-p sakkutuut immikkut sungiusakkat atorlugit timmisartunillu saassussisarnini sakkortusisimallugit.

Maannalu USA-p generalia Petreus, NATO-mi naalagaanerpaap, sakkoq ulorianaateqarluinnartoq atulersimavaa.

Nalinginnaasumik qamussuit guerillanut sorsunnernut atussallugit naleqquttutut isigineqanngillat, assersuunneqarlutillu niviukkanik kaatarsuaq atorlugu toqoraanertut.

Sorsunneq maanna ukiuni qulinguiluani sivisussuseqalerpoq, taamaattorli danskit canadamiullu kisimiugallartoq sakkut oqimaannersaat qamussuit killilimmik Talebanimut akersuunnerminni atortarsimavaat.

Taamaattorli ukiut taakku ingerlareersut aamma amerikamiut qamussuit atorlugit misiliinialersut, Washington Post allappoq.

Siullermik qamussuit nutaaliaanerpaat 16-it nassiunneqarsimapput Helmand provinsimi akiuutoqarfimmut, taakkulu iluatsissappata suli ilaqqinneqarsinnaallutik.

Taakku qamussuit 68 tonsinik oqimaassuseqarput, qamutileqarlutillu uniuineq ajortunik.

Timmisartut sorsuutit atorniaraanni taakku kalerrinneqaqqaartussaapput eqqorniakkallu tungaannut ingerlaqqaartariaqarlutik saassunnginnerminni. Qamussuilli sakkutuut ingerlaqatigisarpaat ungasissumiillu eqqorniagartik eqqortarlugu.

Amerikamiut sakkutuut naalagaasa sakkoq taannarpiaq siusinnerusukkut attorumasimanngilaat, pissutiginerullugu russit 80'ikkunni Afghanistanimi sorsunnerminni qammussuit sinnikorpassuinik qimagaasimavallaarmata. Afghanistan russit qamussuakuinik ikuallassimasunik manngertornisunik ullumikkut ulikkaarpoq.

Qamussuit sakkutut atulernerani Pentagonimi atorfilik Washington Postimut oqarpoq: "Maanna aaqqatigut kusanartut peerpavut, qamussuarlu atuligarput sakkortuupilussuarmik sunniuteqarpoq.", DR ilanngutassiivoq.