NATO issittumi sakkutuunik amerlisaanianngilaq

Fogh ataatsimiinnermi oqarpoq, sakkutooqarnikkut suleqatigiit Issittumi amerlineqarnissaat NATO-p pilersaarutiginngikkaa. Rusland Canadalu sakkutuumik Issittumiittut amerlinissaat kissaatigigitsik oqareersullu Fogh taama oqarpoq.

- NATO-mut ilaasortat ilaat sumiiffinnut avannarpasinnerusunut immikkut soqutiginnipput, Issittullu avannaani namminneq pilersaaruteqarlutik, Anders Fogh Rasmussen oqarpoq.

Nunat unammilligassanut naammattoorsinnaasassaminnut namminneerlutik eqqissisimasumik aaqqiisinnaassasut Foghip qularinngilaa.

Ruslandimi illersornissamut ministeri, Anatolij Serdjulov, sapaatip-akunnerani kingullermi nalunaarpoq, sakkutuutik Ruslandip kimmut avannarpasissuani ataatsimoortunik sakkutuuliiniartut - taakku Murmanskimi Arkhangelskimilu inissinneqassagunarput.

Ruslandimit taama nalunaartoqareersorlu Canada ullualunnguit qaangiuttut nalunaarpoq, Issittumi sakkutuutik amerliniarlugit, sakkutuut Afghanistanimiititamik angerlakaanerat ilutigalugu. Tamannalu sapaatip-akunnerani uani aallartittussaavoq.

USA-p sakkutuuni Issittup tungaanut aamma avannarparterusuppai, Canada Nunarput/-taamaalillunilu aamma Danmark- sakkutooqarnikkut Pituffik aqqutigalugu qanittumik tamanna pillugu suleqatigiipput.