Naternami umimmanniartarneq pillugu paasiniaavoq
Avannaani Qasigiannguit kujataatungaanni Naternami umimmanniartarneq pillugu Atassut sinnerlugu Inatsisartuni ilaasortaq Qasigiannguaneersoq, Kristian Jeremiassen Naalakkersuisunut apeqquteqarpoq.
-Naternami umimmaat pisarineqartartut amerlineqarsinnaanerat Naalakkersuisuni eqqarsaatigineqarsimanerluni? Naternamut umimmaliinermut aningaasaliisimasut, tassalu Qasigiannguit, Aasiaat Kangaatsiarlu kisimik pisassinneqartassappat? Aamma Naternami umimmannik kisitsisoqarniarluni?
Kristian Jerimiassenip apeqquteqarnerminut, Naternami ukioq manna umimmattassiisimaneq tunngavigaa.
-Ulloq manna tikillugu umimmaat pisarineqartartut amerlagisassaanngillat, Qasigiannguit, Aasiaat Kangaatsiarlu ukioq manna katillugit 15-inik agguagassinneqarput, naak umimmaat amerlassusaat eqqarsaatigalugu pisassiissutigineqartut ikigineqarsinnaagaluartut, Kristian Jeremiassen allappoq.
Tunngavilersuutigaa umimmaat amerlilluinnarsimanerisigut kommuneqarfinni pineqartuni nunap ilarujussuata naggorlussiartuinnarsimanera.
Kristian Jeremiassen aamma allappoq, umimmannik 2000-kkulli aallartilaarnerini kisitsisoqarsimasoq, kingornalu kisitseqqittoqarsimanngitsoq.
Naalakkersuisut Kristian Jeremiassenimut akillutik allapput, Naternami umimmaqatigiit suli annertuumik mianersorfigalugit aqutsivigisariaqarmata, pisassat amerlineqarnissaannut suli tunngavissaqanngikallartoq.
Taamattorli naammagittartumik, mianersortumillu, pisassiisarnermi, periuseqarnikkut, umimmattassat ukiualunnguit qaangiuppata amerlineqarsinnaajumaartut Naalakkersuisut akipput.
Taakku aamma ilisimatitsissutigaat, Pinngortitaleriffimmiut, siunissaq qaninnerusoq eqqarsaatigalugu, Naternami umimmannik kisitsinissamut pilersaaruteqanngitsut.
Qasigiannguit, Aasiaat Kangaatsiallu kommunii kisitsisinik nutaanik pissarsinissamut soqutiginninnerannik paasiniaaffigissallugit Naalakkersuisut pilersaaruteqarnerarput, kisitsisoqassagaluarpallu aningaasaliisinnaanermut tunngasunik eqqartueqatiginninnissamut aamma pilersaaruteqarlutik.
