Nassuiaat Naalakkersuisut tusaatissatut tiguaat

- Ilumut unioqqutitsilluni timmisartuussisoqartarsimanersoq misissuinermi uppernarsineqanngilaq. Kisianni CIA-p timmisartuussisarsimasinnaanera ilimagineqarpoq. Kisianni timmisartuussinerni sunik angallassisoqartarsimasinnaaneranik tigusanillu angallassisoqarsimasinnaaneranik takussutissartaqarsimanngilaq, Per Berthelsen oqarpoq, nangillunilu.

- Taamaammat Naalakkersuisut aalajangerput, ilumut timmisartuussisoqartarsimasinnaaneranik kingumut misissuisoqaqqinnissaa pissutissaqanngitsoq. Paasissutissanilli nutaanik takkuttoqassappat suliaq nalileqqinneqassaaq. Kisianni naalakkersuisut aamma pakatsipput.

- Naalakkersuisut pakatsissutigaat, silaannatta Danmarkimit nunatsinnilu oqartussanit akuersissutitaqanngitsumik timmisartuussisoqartarsimaneranik erseqqinnerusumik USA ilumuunnginneraanngimmat, Aningaasaqarnermut Nunanullu allanut Naalakkersuisoq nangippoq.

- Unioqqutitsilluni timmisartuussisoqarsimasinnaaneranik paasisaqarnissaq unitsitsinissarlu siunertaralugit iliuuseqarnissaq qulakkeerneqartariaqarpoq. Naalakkersuisut ukioq manna februaarimi timmisartunik nakkutilliineq sukannernerulersippaa, peqatigitillugulu CIA timmisartuussisarsimanersoq pillugu danskit naalakkersuisui suleqatigiissitaliorpoq, Kalaallit Nunaanni Savalimmiunilu naalakkersuisut peqataatitaqarfigisaannik.

Suleqatigiissitaq Nunani tamalaani Danmarkip pisussaaffii unioqqutillugit Danmarkimi, Kalaallit Nunaanni Savalimmiunilu silaannaap mittarfiillu siunissami atorneqannginnissaat qulakkeerniarlugu iliuuserineqarnissamut innersuussuteqartuuvoq. Taannaavorlu nalunaarusiamik ullumi saqqummiisoq, Per Berthelsen naggasiivoq.