Nassuiaasoqarnissaa piumasarinianngilaa

Christian Larsen Kalaallit Nunaannut ippassaq tikippoq, Saarlumi umiartortut marluk ajunaarnerat pillugu misissuiartussalluni.

- Ajunaarneq pillugu killisiunianngilagut, umiarsuarmili inuttaasut oqaloqatigissavagut ajunaarnerup ajutoornerullu nalaani pisut pillugit, Christian Larsen oqarpoq.

Imarsiornermi killisiuisoqarnissamik allat piumasaqarsinnaanerat mattunneqanngitsoq, Christian Larsenip erseqqissarpaa. Ajunaartut annanniutinik atorsimanersut Imarsiornermik Qullersaqarfiup nalinginnaasumik misissuinermi paasiniartussaavaa, imigassartortoqarsimanersorlu aamma paasiniarneqassalluni.

Umiarsuaatileqatigiiffiup Orasilap piginnittuata sinniisua, umiarsuullu sillimmasiisarfianeersoq, ippassaq aamma tikipput. Orasila ikkarlimmat ajoqusernerit misissuiffigineqassapput, angalaqqissinnaanersorlu naliliiffigineqassalluni.