Nassaarineqartoq silaannarsuarmiuunngilaq
Tatsimi Californiamiittumi Mono Lakemi ilisimatuut Nunarsuatsinni siullerpaamik tappiorannartumik uumassusilimmik pinngoqqaatimik toqunartulimmik arsenimik uumassuteqartumik nassaarsimapput, taanna uumassusillit allat assiginagit fosforiunngitsumik sananeqaateqarpoq, naak maannamut fosfor sananeqaatini DNA-ni tunngaviusutut isigineqartaraluartoq.
Taamatut paasisaqarneq uumassusilerinermik ilinniutinik tamanik allanngortitsissasoq Nunarsuullu avataani inuuneqarneranik ujaasinermik annerulersitsissasoq, NASA-mit oqaatigineqarpoq.
NASA-p taamatut nalunaaruteqarnera kalaallip ujarassiuup ilisimatuup Minik Rosingip aamma maluginiarsimavaa.
- Tamanna paasisaavoq pingaarutilerujussuaq, tassami uumassusillit tamarmik ataatsimoorussaattut isigisaraluatsinnik allatut isiginnilersippaatigut. Inuuneqassuseq ilimagisaraluatsinnit allanngorarfeqarnerullunilu eqqumiikajaarnerugunarpoq, Minik Rosing Videnskab.dk-mut oqarpoq.
Ph.d-nngorniap Emma Hammarlundip Syddansk Universitetimi Nunarsuup Ineriartorneranut qitiusumik ingerlatsivimmeersup NASAp paasisaminik nuannaarutiginninnera paasisinnaalluarpaa.
- Paasisaq avataarsuani uumassuseqartoqarsinnaaneranut atatillugu soqutiginarluinnartuuvoq, tassami taamaalilluni ilimagineqarsinnaanngormat inooriaatsit aamarsuarmit, imermit aamma forforimit kisimik pisuunngitsut, Emma Hammarlund videnskab.dk-mut taama oqarpoq.