Naser Khader-ip parteertaava tapersersorluarneqarpoq

Danmarkimi partip nutaap Ny Alliancep pilersinneqarneranit nalunaaquttap akunnialunngui qaangiutiinnartut inuit 2143-t partimut ilaasortanngorsimapput. Aviisip Politikenip nittartagaani taama allaaserinnittoqarpoq. Ilaasortanngornerit partip nittartagaatigut ingerlanneqarput.

Radioaviisip naalakkersuinermut malinnaasuata Klaus K. Nielsenip Naser Khaderip Radikalenit anilluni Anders Samuelsen aamma Gitte Seeberg peqatigalugit partimik nutaamik NyAlliance-mik pilersitsinera siunissami qanoq sunniuteqassanersoq ima nalilersorpaa:

Danmarkimi naalakkersuinikkut ingerlatsineq eqqoriaruminaannerulerpoq. Piffissami aggersumi qanoq pisoqassanersoq apeqqutaalerpoq. Tamatumani apeqqutaalerami politikerioreersut qanoq amerlatigisut NyAlliancemut ilaasortanngussanersut aamma qinersisartunik isumasiuinerit qanoq inerneqarumaarnersut. Oqartoqarsinnaavoq NyAlliancemik pilersitseqataasut tassaammata inuit naalakkersuinikkut nuimasut pingasut, folketingimullu ilaasortaatitaqalernissaat ilimanarluinnarpoq, ingammik parti pilersinneqarnermini ullormi siullermi 2100-nik ilaasortaqalereersimammat.

NyAlliance aamma Radikale-t imminnut qanittunnguupput, matumanili apeqqutaalerpoq partit taakkua marluk kina ministeriunissatut toqqarumassaneraat. Assigiinngissutaat tassaavoq NyAlliancep Fogh ministeriunertut toqqarumammagu Radikale-lli taanna ministeriunertut toqqarumanagu.