Nasartaatit inerteqqutaajunnaarsippaat
Tyrkiamiut amerlanerit tamanna tapersersorpaat.
Tyrkiamiulli suli amerlasuut inatsisartut aalajangernerat akerleraat, upperisammi naalakkersuinerullu immikkoortinnissaat inatsisini tunngaviusuni allaqqammat.
Arfininngormat inuit 120.000-it missaat akerliussutsimik takutitsipput, Tyrkiap sekularitut, tassa inuiaqatigiit aqunneqarnerat upperisarsiornermit sunnerneqartussaanngitsutut iingerlatiinnarusukkamikku.
Præsident Erdoganip partiiata inatsit atorunnaarsippaa, taamaammat Tyrkiamik tunngaviliisup takorluugaanik, inuiaqatigiit aqunneqarnerata upperisarsiornerullu avissaarsimalluinnarnissaannik qarajaasutut isigineqarput.
Daniella Kushmanovitj Antropologitut ilinniarsimasoq, Tyrkiamiullu politikkiat pillugu ilisimatusartoq oqarpoq, 1920-kkunnili Tyrkia ullumikkutut nalunngisarput tunngavilerneqarmat arnat nasartaateqartariaarunnertik pissutsinut nutaanut ikaarsaariarnertut isigisimagaat, tunngaviliisullu, Mustafa Kamal Atathürkip takorluukkaminut ilaatillugu inatsisinut ilanngunneqarnissaa pingaartissimagaa.
1980-ikkunni islamisiortut pissaaneqarnialeraluaramik nasartaateqarnermut apeqqut akerleralugu saqqummertaleraluarput. Atathürkip Tyrkia nutaaq tunngavilinngikkallarmagu Osmanit naalagaaffigigaluarpaat islamisiortut upperluarniartut pissaaneqarnerannik tunngavilersorneqartoq. 1920-kkunnili Atathürkip tapersersortaasalu inuiaqatigiit aqunneqarnerata upperisarsiornermit avissaartilluinnarneqarnissaa anguniarsimavaat.
Maannakkut inatsisip siunersuutigineqartup Tyrkiap inatsisartuini akuersissutigineqarnissaa naatsorsuutigineqarpoq.
