NASA issittup sikuanik nalunaarsuivoq
Issittumi siku timmisartoq DC-8 atorlugu amerikamiunit alaatsinaanniarneqarpoq. Ilisimatuut timmisartoq misissuinissaq pillugu atortulersoreerpaat, suliniullu Operation Icebridgemik taaguuteqarpoq.
Allattoq Mads Lynge
marsip 22-at 2010 05:15
Timmisartoq nunatsinnut ullumi tikissaaq. Californiami radioqarfiit ilaat Southern California Public Radio taama allaaserinnippoq.
Timmisartoq amerikamiut avataarsualiartitsisarfiannit NASA-mit pigineqarpoq, Californiallu kujasinnerusortaaniit Nunatsinnukartinneqassalluni.
Ilisimatuut ullumimiit sapaatip-akunnerinilu tallimani tulliuttuni Nunarsuatta avannaarsuanukaqattaassapput, siku qanoq siaruarsimatiginersoq, qanorlu issutiginersoq, uuttortartassallugu.
- Issittumi siku marsimi apriilimilu issunerpaaffimminiittarpoq, pingaaruteqarporlu tamanna nalunaarsussallugu, NASA-mit taama nalunaaruteqartoqarpoq.
Sermersuup issussusaa misissorneqassaaq, sermillu iigartartut aamma malinnaavigineqassallutik.
