Narsarsuaq-Keflavik Air Greenlandip peerpaa

Tassunga pissutaavoq aqqummut tunisat naammaginarsimannginnerat, Air Greenlandip niuernermik ingerlatsinermut pisortaa, Udo Glashoff, ilisimatitsivoq. Akerlianilli Narsarsuup Københavnillu akornanni pilersaarutit malillugit, tassa aasaq naallugu, timmisartuussisoqassaaq. Tamanna pereerpat aqqut taanna aama matuneqassaaq.

Nuummiit Keflavikimut tunisat Udo Glashoffip akerlianik ajunnginneraqai. Tamatumalu kinguneraa Nuummiit Keflavikimut maajip ulluisa arfineq-pingajuaniit juunip ulluisa qulingiluaata tungaanut, aamma septembarip ulluisa arfineq-pingajuanniit 18-iata tungaanut sapaatip akunneranut marloriarluni timmisartuussisoqartarnissaa.

Ilaasussat Narsarsuarmiit Keflavikimut bilitsisereersimasut akiliutiminnik utertitsisinnaapput, imaluunniit Nuukkoorlutik ingerlanissamik neqeroorfigineqarlutik.