Narsarsuaq akilersinnaaneruvoq

Qaqortumi mittarfiliortoqarsinnaaneranut atatillugu misissuinerit nalilersuinerillu takutippaat Narsarsuarmi mittarfik kujataani silaannakkut angallannermi qitiutinneqarpat tamanut akikinnerpaassasoq. Taamaakkaluartoq Inatsisartut Angallannermut Ineqarnermullu ataatsimiititaliaata innersuussutigaa Qaqortumi mittarfiliorsinnaanerup misissuivigineqarnerata ingerlaannarnissaa. Ataatsimiititaliarli isumaqatigiittoq inatsisartunut oqarpoq massakkutut ilaasinnaasut angallanneqarsinnaasullu taama killeqartigigallartillugit Qaqortumi mittarfiliornissaq imminut akilersinnaanavianngitsoq. – Aappaatigulli illersorneqarsinnaanngilaq illoqarfik Qaqortutut angitigisoq qulimiguulimmik taamaallaat silaannakkut attaveqartinneqassappat, inatsisartut Angallannermut Ineqarnermullu ataatsimiititaliaa allappoq.

Qaqortumi suluusalinnut mittarfissaq 1.199 meterinik takissuseqartussaq 900 millioner koruuninik akeqartussatut tagginneqarpoq.