Narsarmiut Nuummi ajugaasut
![](/sites/default/files/styles/image_934x467/public/article_images/sara_og_rina630_1.jpg?itok=EKNzNSeV)
![](/sites/default/files/styles/image_934x467/public/article_images/narsaq_spilllere_630.jpg?itok=_Re2V2ue)
![](/sites/default/files/styles/image_934x467/public/article_images/hans_brummerstedt630.jpg?itok=7JIBdLSy)
![](/sites/default/files/styles/image_934x467/public/article_images/nick_og_thomas630.jpg?itok=jUiJIPeR)
Nuka Mark Nielsen Narsameersoq. Tassa ateq immaqa siunissami tusartualigassarput sulorarneq pineqartillugu. Taanna 13-iinnarnik ukioqaraluarluni Nuummi illoqarfimmi pissartanngorniuttoqarmat U-19-ni aamma U-17-ni peqataavoq. Ataasiakkaarnermi finalemut anngutikkaluarpoq, taamaattoq nersualaarneqaqaaq.
Nuummi illoqarfimmi pissartanngorniunnerit adventip sapaataasa aallaqqaataanni naggaserneqarput. Ilimagisaareersutut Frederik Elsner aamma Sara Lindskov Jacobsen ataasiakkaarnerni ajugaapput. Taakku nunatsinni pissartat angutit ataasiakkaarneranni aamma unamminerni aallarniutaasuni unammipput. Frederik Elsner tassani ajugaavoq 21-15 aamma 21-7-mik. Sara Lindskov Jacobsenip aamma unammivaa Daniel Boassen ajorsarfigaalu 21-13 aamma 22-20-mik.
Illoqarfimmi pissartanngorniuttut aamma Narsamiit tikeraartoqarput taakkulu timersornikkut nuannersunik misigisaqareerlut angerlamut aallarput.
Ineqi Sakariassen aamma Cece Josefsen Narsameersut U-17-ni arnat iligiiaarneranni kultinnaapput, aamma Nuka Mark Nielsen Cece Josefsen U-17-ni arnat angutillu akuleriillutik unammineranni sølvinnapput. Nuka Mark Nielsen aamma Martin Sikemsen angutit iligiiaarneranni sølvinnapput assanni Nick Jakobsen aamma Thomas Madsen ajugaammata.
- Kisianni oqartariaqarpugut inuusuttuaqqat akornanni Nuka Mark Nielsen siunissamut piukkunnarnerpaat ilagigaat. Eqqaamassavarpummi 13-iinnarnik ukioqarmat, Anni Damgaard B-67-miit taama oqarpoq taassumalu unamminerit Nuummi Illorsuarmi timersortarfimmi aamma Inussivimmi malinnaaffigisimavai.
Hans Brummerstedt B-67-imeersoq pingasunik kultinnappoq U-19-ni ataasiakkaarnermi, iligiiaarnermi aamma arnat angutillu akuleriillutik iligiiaarneranni ajugaangami.
Nuummi illoqarfimmi pissartanngorniunneq aamma sulorartartunut inuusuttunut periarfissatsialaavoq Arctic Winter Games-imut toqqaanissaq sioqqullugu malugineqarluarnissamut.
Linki ataaniittoq toorlugu angusat tamakkiisut takusinnaavatit.