Narsarmiut eqqagaat Qaqortumut nassiuttalerniarpaat
- Eqqaaviup atorneqarnera pitsanngortinniarlugu ukiuni kingullerni sioqqanik matoortalernikuuarput, ikuallannikinnerulerneranik kinguneqartumik, ullormiit ullormut eqqakkat ikinneqartartut ataasiakkaat eqqaassanngikkaanni, Narsap kommuniata ingeniøria, Steffen Rosing Berthelsen oqarpoq.
Narsap kommuniata nammineq eqqaavissuaq kukunneq ajoraa aamma unnerpaa. Eqqakkat siunisami amerligaluttuinnassanngippata ikuallaavittaarnissaq eqqarsatigeqqajaanassagaluarpoq.
- Ikuallaavittaarnissaq tamaviaarupparput. Misissuinerilli aallaavigalugit aningaasaliissutit unitsinneqaramik. Tasiilaq Narsarlu tulliukkaluarput. Ikuallaavik piukkunnartoq taamani 25 mio. koruunit 30 mio. koruunillu akornanni akeqarpoq, affaa kommunimit akilerneqartussaalluni. Kisianni Narsap Kommunianut 10 mio. koruunit 15 mio. koruunillu akornannik akiliissaguni, taakkua amerlapput, kommuneingeniøri oqarpoq.
Kisianni Narsami aaqqissuutissanik allanik eqaarsaateqarput.
- Narsap kommunia eqqakkanut poortuivimmik pissarsinikuuvoq, eqqakkanik naqittarlugit poortuisinnaasumik. Taava Qaqortup Kommuniata ikuallaaveqarnera iluatsillugu tassunga assartorneqarsinnaasut isumaavoq. Suliffiutilik nunnigussissummik angallataatilik suleqatigalugu eqqakkanik Qaqortumukaassuinissaq upernaaq manna piareersarparput, aallaqqaammut misiligutitut taallugu, Narsap kommuniata ingeniøria, Steffen Rosing Berthelsen, oqarpoq.
