Narsaq umiarsuit tikinnaveerpaat
juulip 10-at 2007 15:52
Narsamut nassiussat upernaaq manna pingajussaannik piffissaq eqqorlugu apuutinngitsoorput. Sikorsuaqarnera pissutigalugu Naja Arcticap Narsamut nassiussanik ingerlassiniarnini taamaatiinnartariaqarsimavaa.
Royal Arctic Linep atlantiku ikaarlugu assartuutaasa ukioq-manna arfineq aappassaanik Narsaliarniaraluarnerat iluatitsinngitsoorpoq, umiarsuarlu maannakkut Nuummukarpoq.
Sikorsuit nunamiit avammut 25 sømilinik eqimassuseqarmata Naja Arctica Narsap tungaanut appakaassinnaasimanngitsoq umiarsuaatileqatigiinni ataqatigiissaarisoq Jens Ole Nielsen oqarpoq.
Nassiussat Erina Arctica atorlugu Nuummiit tallimanngorpat juulip ulluisa 13-ianni Narsaliaanneqassasut, Royal Arctic Linermiut ilisimatitsipput.
