Narsaq Namminersornerullutillu Oqartussat suleqatigiilerput

-Narsap Kommuniani Inunnik Isumaginninnermi ataatsimmiititaliaq Nuummi Ilaqutariinnermut Pisortaqarfimmut qaaqquara, Narsami ajornartorsiutit qanoq ittunik sinaakkusersorlugit qaangerniassanerigut ataatsimoorluta oqaloqatigiissutiginiassagatsigu, Ilaqutariinnermut Peqqissutsimullu Naalakkersuisoq, Tommy Marø, ippassaq ualingaatsiartoq Narsamiit aallannginnermini taama oqarpoq.

Inunnik Isumaginninnerup ataani ajornartorsiutit annertoorujussuit, Narsap Kommuniata kisimiilluni nammassinnaangisai, kommunalbestyrelsimi ilaasortat tikeraallu oqaloqatigiissutigaat.

- Illoqqortoormiuni ajornartorsiutit qaangerniarlugit suleriaaseq atorlugu, Narsami misiliisoqarsinnaanera siunnersuutigaara, kisianni tassa qanittumik suleqatigiinnissarput siunniupparput tamannalu piaarnerpaamik sapaatip akunnerata tullianiilluunniit aallartinneqarsinnaavoq, Naalakkersuisut siulittaasuat Hans Enoksen oqarpoq.

Ataatsimmiinneq naammassimmat Narsap borgmesteria Kiista Isaksen nuannaaqaaq.

- Nukappiaqqanut ilaqutaannullu ikiuigasuarfissaq Paarsineq kommunalbestyrelsip tamarmiusup akuersissutigereerpaat. Tassani pineqarput nukappiaqqat atornerlunneqarsimasut ilaqutaannillu katsorsaaviusinnaasoq, taamaattumik Inunnik Isumaginninnermi ataatsimiititaliaq piaarnerpaaq atorlugu Nuuliarsinnaavoq, pisariaqartitavut suunersut oqaloqatigiissutigiartorlugit. Kista B. Isaksen oqarpoq.

Erseqqissarpaa Hans Enoksen-ip siunnersuutaanut tunngasoq kommunalbestyrelsimi suli oqaluuserisimanngikkitsik.