Narsap Kommunia aningaasanik agguaavoq

Narsarmiut juullikkunni aningaasassaaleqinngillat. Narsap Kommuniani 2008-mut missingersuummi aningaasat sinneqartoorutit kommunalbestyrelsip aalajangiineratigut utoqqalinersiutilinnut kommunillu allaffeqarfiani sulisunut agguaanneqarput.
Allattoq Louise M. Kleemann
decembarip 29-at 2008 10:15

Narsap Kommuniani utoqqalinersiutillit tamarmik 500 koruuninik juullimi tunineqarput, aamma kommunip allaffeqarfiani sulisut 30-it missaanniittut tamarmik immikkut 4.000 koruuninik tunineqarlutik.

Narsami borgmesteriugallartoq Josef Petersen oqarpoq kommunit kattunnissaannut atatillugu sulisut sulilluarsimanerat aningaasanik agguaassinermut tunngavigineqartoq.

Kommunalbestyrelsimi ilaasortat naggataamik ataatsimiinnerminni aningaasanik tunioraaginnanngillat, tassami bilinik arfinilinnik tamarmik immikkut 300.000 koruunit missaannik nalilinnik, aamma pisipput.

Narsap Kommuniani borgmesteriugallartup Josef Petersenip oqaatigaa aningaasat sinneqartoorutit agguaanneqartut 3 milliuuni koruunit missaanniissasut. Kisiannili qasserpiaanersut iluamik erseqqissumik oqaatigisinnaanngilaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq