Narsap Atuarfia atoqqinneqassanngilaq

Narsap atuarfiani radon-eqartumi oqoqartumilu meeqqat atuartinneqaqqissanngillat, taama nalunaaruteqarpoq Kommune Kujalleq.

Narsami atuarfik suliarineqartinnagu, meeqqat tassani atuartinneqaqqissanngitsut, Kommuni Kujallermi kommunalbestyrelsip atuartitaanermut meeqqeriveqarnermullu ataatsimiititaliaata ippassaani ataatsimiinnerminni aalajangerpaat.

- Taama aalajangernitsinnut pissutaavoq, meeqqat ilinniartitsisullu peqqiilliortalersimaneri maluginiarneqarsimammat, pingaartumik anersaartorniarnermikkut ippigusuttalersimallutik, Tamanna annertuumik iusmakululersitsivoq, ataatsimiisitaliap siulittaasua, Karla Egede Bisgaard tusagassiutinut nalunaarummi allappoq.

Narsap Atuarfiata radoneqarpallaalersimanerata kinguneranik atuarfiup iluata silaannaa peqqinnarunnaarsimavoq meeqqanut ilinniartitsisunullu peqqinnarunnaarluni. Atuarfiup ilarujussua qangali atorunnaarsinneqareerpor tamassuma oqoqarnera pissutigalugu.

Ataatsimiisitaliap piumasaraa, atuarfik pilertornerpaamik suliarineqartariaqartoq tamatumalu saniatigut piumasaralugu, Ilinniartitaanermut Naalakkersuisup, ukioq atuarfiusoq manna naammassineqannginnerani atuarfik takuniartariaqaraa.

Atuartitaanermut paaqqinninnermullu ataatsimiisitaliap maanna suliarileruttorpaat, ininik atuartitsiffiusussanik nassaarniarneq.