Meeqqanut arfinilinnut ulloq unnuarlu angerlarsimaffissaq nutaaq Narsami ukiumi nutaamiit atulertussanngortoq Narsami kommunalbestyrelsip akueraa.
-Siunertarivarput ilaqutariit avissaartuutsinnagit sullinneqartarnissaat, ullumikkullumi ilaqutariinnut sullissivipput nutaaq aqqutigalugu ilaqutarinnik ataatsimut katsorsarsinnaalerpugut, taama oqarpoq Kiista P. Isaksen Narsap borgmesteria.
- Aalajangeraani Meeqqanut inissiisarfimmut inissiiniarluni taava suliassaq siullerpaaq tassaasarpoq pingaaruteqarluinnartoq; tassalu meeqqap taassuma angerlaqqinnissaata sullisigineqarnissaa, Kiista P. Isaksen oqarpoq.
Nangilluni erseqqissaavoq taamatulli aamma pingaartigisoq angajoqqaat ingerlaannaartumik meeqqaminnik tiguseqqinnissaannut piareersaanneqarnissaat.
- Meeqqap inissinneqartariaqalerneranut tunngaviusimasoq aaqqinneqartariaqarpoq meeqqammi pinngitsoorani angerlarsimaffimminiinnissaa pingaaruteqarmat, oqarpoq.
Nangipporlu:
- Illoqarfiup avataanut inissiinikuuvugut. Taakkulu meeqqat maanga Narsamut utersinnaanngussapput, taama oqarpoq Kiista P. Isaksen, Narsami borgmesteri.
Meeqqat tallimat Narsap avataanut inissinneqarsimasut akornanni pingasut angerlartinniarneqarput. Illutassaalu kommunip pigisaa atulernissaminut piareersimavoq.