Narsami politiit suliassaminnik sumiginnaasutut naammagittaalliutigineqarput

Narsami Inunnik Isumaginninnermut Ataatsimiititaliami siulittaasuugallartoq, Niels Egede Nuummi politimestereqarfimmut politiit suliassiissutaasunik paamaarussisarnerat naammagittaalliutigaa. Pissutaavoq Niels Egedes oqarnera naapertorlugu tallimanngorpat Narsami inuartoqarnera. Tamanna arfininngormat Narsami politiinut annguppaa aatsaalli ippassaq marlunngornermi Narsami politiit iliuuseqarput. – Kusananngilaq, Niels Egede oqarpoq. Niels Egede oqarpoq politiinut arfininngormat saaffiginnikkami oqarfigineqarsimalluni pineqartoq ajunngitsoq Narsarmiullugooq asuli oqallittut. – Tupigusuutigeqaara taama qarsupitsigisumik saaffiginnissutiga tiguneqarmat. Politiit saaffigiuminarnerusariaqarput, Niels Egede oqarpoq. Ippassaq marlunngormat politiit Niels Egedemut saaffiginnissimapput apeqqutigalugu pineqartoq takusimaneraa.

Niels Egede tallimanngormat pineqartoq pillugu saaffigitikkami inuartarineqartup sumiiffigisinnaasai napparsimavillu alakkartertaraluarpai kinguneqanngimmalli arfininngormat politiinut saaffiginnippoq. Politimesterip tullersortaa Morten Nielsen pineqartoq pillugu oqaaseqarumanngilaq, oqarporli angut inuarsimasutut pasineqartoq tigusarineqareersoq taannalu sapaatip akunnerini sisamani tigummigallagassanngortinneqareersoq.