Narsami piginnaanngorsartut 21-t allagartartaarput

Narsami ulluunerani Multicenterimi atuarfittaami, piginnaanngorsarlutik pikkorissartut siulliit naammassisut 21- it ippassaq

allagartartaarput, ilaquttat, ilinniartitsisut soqutiginnittullu allat najuupput.

Pikkorissartut ilaqutariinnit 21-neersuupput, taakkulu sapaatit akunnerini arfineq pingasuni Inuttut Ineriartorneq pillugu pikkorissartinneqaramik, takkuttarnerat agguaqatigiissillugu 91% -usimavoq.

- Nuka Petrussenimik ateqarpunga, neriuppunga procentit pissarsiakka suliffeqarfinniit maluginiarneqassasut, taamaalillunga suliffissannik nassaarsinnaaqqullunga.

- Pingaartillugu sammivarput inuttut nukittunerullutik inoqatinut sassarsinnaanerup piareersarsinnaanissaa. Ittuunnginnerullutik, ajukkutinnginnerullutik, sapiinnerullutik ajukkunnatik inoqatiminnut saqqummersinnaanissaat, Pikkorissartitsisoq Steen Egede Hegelund taama oqarpoq.

- Naluneqanngilaq illoqarfitsinni suliffissaaleqineq annertusimavoq, peqataasimasut namminneerlutik annertoorujussuarmik pilliuteqarlutik inuttut namminneq piumaffigalutik angusarissaarnerat assut tulluusimaarutigivara. Neriuutigivarattaaq siunissami alloriaqqiffissatut pikkorissarnertik atussagaat, tassami ullutsinni inuit sullarissut tunniusimallutik peqataasut pisariaqarteqaagut inuttummi naleqassuseq pingaaruteqaqimmat, taama oqarpoq Kiista P. Isaksen, Narsap borgmesteria.

Ukioq nutaaq aallartisimalerpat modul 2 ingerlalissaaq, tassungalu peqataajumasut amerlasoorpassuupput utaqqisoqalereersimallunilu.

Pikkorissartitsinermi aningaasartuutit Narsap Kommuneata, Inuussutissarsiornermi Pisortaqarfiup Aningaasaateqarfiillu allat matussusersimavaat.