Narsami misissuiviup USA-mik suleqateqarneq nutaaq unitsikkaa
Pinngortitaleriffiup aamma Ilisimatusarfiup USA-mik suleqateqarneq nutaaq unitsillugu KNR-imut qanittukkut oqaatigaat.
Narsami Ilisimatusarluni Misissuiffik suleqatigiinnermik nutaamik unitsitsisunut maanna ilannguppoq.
Tamanna KNR-imi ilanngutassianut qisuariarnerup kinguneranik pivoq.
Narsami Ilisimatusarluni Misissuiffik Lise Autogenamit aamma misissuiffiup siulersuisuinit pilersinneqarlunilu aqunneqarpoq.
Taanna Tuluit Nunaanni Sheffield Hallam Universitymi assigiinngitsunik Eqqumiitsuliornermi ilisimatusartuullunilu professor Emeritusiuvoq.
Taassuma oqaluttuaraa misissuiffik suliffeqarfinnut allanut marlunnut sanilliullugu naalagaaffiup ataani ingerlanneqarani inuinnarnit sunniuteqarniartunit suliffeqarfiuvoq.
Taamaammat Lise Autogenap Nuummi qanoq ingerlatsisoqarnerata tunngaviginissaa immikkut pingaaruteqarnerarpaa.
- Pinngortitaleriffiup Ilisimatusarfiullu pisortatigoortumik sammivigisaanik malinninnissarput pingaaruteqarpoq.
- Suliffeqarfiit assigiinngitsut assigiinngitsumik suliaqarpata tamanna ajornartorsiutaasinnaavoq. Ataatsimoortumik politikkeqarneq nukittuumik politikkeqarneruvoq.
Amerikamiut soqutiginninnerat
Lise Autogenali malinniinnanngilaq. Taassuma Amerikamiut Kalaallit Nunaanni ilisimatusarnermut soqutiginninnerat nammineq malugisimallugu oqaluttuaraa.
Taanna Pinngortitaleriffimmi pisortaq, Josephine Nymand assigalugu Aarhus Universitetimi upernaaq ataatsimeersuarnermi Amerikamiup Tom Dansip aamma peqataaffigisaani peqataavoq.
Tom Dans Politiit Isertortumik Paasiniaasartuisa Kalaallit Nunaanni nakkutigisaat sunniiniartutut taagorneqarpoq.
- Tom Dans issittumi ilisimatusarnermi ataatsimiititaliarsuarmi siulittaasutut toqqarneqartoq tusarakku upalungaarsimanermi kalerrisaarutit tamarmik aallartipput.
- Ilisimatusarnerup politikkikkut siunertamut qanoq atorneqarsinnaanera ernumanarsinnaavoq. Tamanna ajuusaarnarluinnarpoq.
Lise Autogenap Nuummi Amerikamiut Konsulateqarfiani konsulimit Susan A. Wilsonimit attaveqarfigineqarsimalluni aamma oqaatigaa.
Tamanna Nuuk Science Weekimi misissuiviup suliaqarnera pillugu saqqummiinerata kingorna pivoq.
- Kisianni oqaloqatigiinneq USA pillugu pissutsit pissutigalugit ajornakusoortoq misigisimavunga.
Ilisimasanik annaasaqarneq
Lise Autogenap USA-mut atatillugu pissutsit tassunga killinnerat uggoralugu isertuutinngilaa.
Taassuma Josephine Nymand assigalugu suleqatigiinnermi killilersuinerit Issittoq pillugu ilisimasanik amigaateqarnermik kinguneqartoq KNR-imut oqaatigaa.
- Silap pissusia pillugu ilisimatusarneq ataatsimut isigalugu ernumanartippara, pingaartumik nunagut akimorlugit kulturikkut suleqatigiiffiummat.
Narsami ilisimatusarfik kulturikkut ilinniartitsinermillu suliaqarfimmik angallattakkamik pilersitsiniarluni suliniummut aningaasanik maannakkut ujartuivoq. Taanna illoqarfimmi meeqqat suleqatigalugit pilersinneqassaaq.
Tassani suliniuteqarnermit Issittumi, Canadami saamillu akornanni Sápmimi assingusunik suliaqarfeeraqalernissaa neriuutaavoq.
- Tassanngaanniit isigalugu USA-mik suleqateqarsinnaannginneq ajuusaarnaraluarpoq. Piorsarsimassutsip ineriartortinneqarnerani imaassinnaavoq suleqatigiinnerit allaanerusumik nalilersorsinnaagigut.
- Taamaattoqartilluguli isumannaallisaanikkut misissueqqissaarneq siunnersuinerlu pingaaruteqassapput. Immaqa aamma suleqatigineqareersut aqqutigalugit suliarineqarsinnaavoq.
Amerikamiit suleqatini ikiorai
Nutaanik suleqateqarnissap unitsinneqarnerani equngasoqaraluartoq Lise Autogena aalajangiusimaannarpoq.
Taanna isumaqarpoq nunatsinni ilisimatusartut USA-mik suleqatiginnikkumannginnerat Atlantikup illuatungaani suleqatinut ikiuutaasinnaasoq. Taakkumi ersarissumik oqaaseqarnermikkut annaasaqariaannaanerummata.
- Ilisimatusarnerup politikkikkut sunnerneqarnerata sakkutooqarnikkullu akuleruttoqarnerata akuerineqarsinnaannginnera pillugu arlaatigulluunniit USA-mut attaveqartoqartariaqarpoq.
- Ataatsimut isigalugu Amerikamiut politikkiat silap pissusiata ilisimatusaatigineqarneranut ajornartorsiortitsivoq. Tamanna paasissutissat attaveqaasersuutillu aserornerisigut, aserorterinissamik siorasaarinikkut oqaatsillu aalajangersimasut atorneqarnissaannut killilersuinermikkut.
