Narsami kulturikkut illu A-21 akerliunissamik sunniiniarnermut atorneqassanngilaq
Narsap Kommuniani Meeqqanut Kultureqarnermullu Immikkoortortaqarfimmi pisortaq Suka K. Frederiksen ullumi ilisimatitsigaluarpoq A-21-p kikkunnit qaqugukkullu atorneqarnissaa maleruagassaqanngitsoq. Taamaakkaluartoq taassuma itigartitsisimanera borgmesterip illerpaa.
- Uanga tassa meeqqanut kultureqarnermullu immikkoortortaqarfimminngaanniit aalajangiunneqarsimasoq allanngortissinnaanngilara, Kiista P. Isaksen oqarpoq. Kulturikkut illu A-21 tassaanerarpaa pisortat pigisaat kulturikkut assigiinngitsutigut innuttaasunut tamanut ammasumik atugassaasartoq.
- Akerliussutsimik takutitsinertut taallugu ataatsimiiffigineqarnissaata unitsinneqarsimanera allanngortinnavianngilara, nangippoq.
Tamanut paasisariaqarnerarpaa innuttaasut namminneq soqutigisaminnik ingerlataqarniarnerminni mattunniarneqanngimmata. Periarfissat allat aamma atorneqarsinnaammata.
- Peqatigiiffiit allat assigalugit kommunip illuutaanik atorniarluni qinnuteqartoqarsinnaavoq, aamma ilaatigut katersortarfik periarfissaasinnaagaluarluni. Kiista P. Isaksenip aamma erseqqissarpaa, Peqatigiiffiup Earth Charterip Narsamiittup uranimik piiaasoqannginnissaanik innuttaasut allat politikerillu kiminniarsarissallugit siunertaqarnera akuerineqarsinnaanngitsoq, illuinnaasiornerummat. Taamaammat kommunip illuutai illuinnaasiortunut matoqqasut oqaatigaa. Narsap Kommuneata taama isummernera Kommune Kujallermi Ikaarsaariarnermut Ataatsimiititaliami ilaasortap Lisbeth Søvndahl Pedersenip ulloqeqqanut radioaviseqarnitsinni naqisimaneqarani oqaaseqarsinnaatitaanermut killilersuinertut taasariaqarnerarpaa. Taamaattoqanngitsorli, Kiista P. Isaksen nassuiaavoq.
- Tassami uani ingerlatsiviit, assersuutigalugu meeqqeriviit, børnehavet innarluutillillu angerlarsimaffii ataatsimiiffiginiarneqalerpata kikkulluunniit tikilluaqqusaaffioattut ingerlatsiviussapput. Taamaammat immikkut soqutigisallit soorlu akerliussutsimik takutitsinerit kommunip ingerlassinnaanngilai, uanga taanna nammineerlunga aamma isumagivara, Kiista P. Isaksen taama oqarpoq. Inatsisartut tallimanngorpat novembarip ulluisa 21-ianni urani eqqartussavaat.
