Narsami inunnik isumaginninneq

Narsap Kommuniata inunnik isumaginnittoqarfia ukiup naanerata tungaanut 4.2 mio. koruuninik immikkut tapiissutinik pisariaqartitsitivoq, takkulu qinnutigineqarsimapput. Narsami Inunnik Isumaginnittoqarfik meeqqanut innuusuttuaqqanullu maannamut 2.2 mio. koruuninik aningaasartuuteqareersimavoq.Narsap Kommunia ukioq aallartimmat meeqqat pingasut ulloq unnuarlu paaqqinnittarfinnut inissinneqarnissaannut aningaasartuuteqassalluni missingersuusiorsimavoq aammalu angerlarsimaffiup avataanut meeqqat 11-it angajoqqaarsiaqarlutik inissinneqarnissaat missingersuusiatut naatsorsuutigisimaneqarlutik, kisianni kisitsisit amerlanerupput tassami meeqqat pingasuunngitsut arfineq marlulli ulloq unnuarlu paaqqinnittarfinnut inissinneqarsimasut maannamut 1,1 mio koruuninik aningaasartuutaareersimapput meeqqat inuussuttuaqqallu 15 –it angajoqqaarsiaqartinneqalersimapput naak 11-nut ani ngaasartuuteqarnissaq missingersuutaasimagaluartoq taakku 1,1 mio koruuninik kommunimut aningaasartuutaasimapput paarsinersiutinut allanut taakkununnga attuumassuteqartunut aningaasartuutit matussuserneqarsimallutik.Siusinaarlutik pensionisiallit naatsorsuutigisamit 11-nik amerlanerusimapput, maannamullu taakununnga kommunip atugassiissutaanit 98 procentii atorneqareersimapput, ukiullu sinneranut suli pisariaqartitsisoqarluni.Annertussusileriikkanik ikiorsiissutit, ikiuutit pisartakkat aammalu suliffissaaruttut ulluinnarni inuuniarnerannut kommunip akiliutigisartagai ilanngukkaanni 4,5 mio. koruunit atorneqareersimapput.Aamma angerlarsimaffinni ikiorteqarnissamik pisariqartitsisut naatsorsuutigisamik amerlanerusimapput kiisalu utoqqaat illuani ikiortariaqartut naammaginartumik sullinneqarnissaannut sulisut amerlisinneqarsimapput, taakkununngalu 5,4 mio. koruuninik Narsap Kommunia aningaasartuuteqarsimavoq.