Narsami inissianit anisitaasut ilaat meerartaqarput siusinaartumillu pensionisiaqartuullutik
Anisitaasussat taakku ilagaat ilaqutariit meerartallit, siusinaartumik pensionisiallit aamma inuusuttut. Taakku tamarmik inissiigallartarfinnut qaammatini pingasuugallartuni maanna inissinneqarallartut, Kommune Kujallermi inunnik isumaginninnermut pisortap, Bodil Svarep oqaluttuaraa.
- Ilaat ilaqutariiupput meerartallit, ilaat siusinaartumik peensionisiaqartut ilaallu inuusuttuullutik 20-it 30-illu akornanni ukioqartut. Takusinnaavarpullu akiliisinnaanatik anisitaasussaasut inuusulligaluttuinnartut aamma taakku ilaqutaasa ilaat akiliisinnaannginnertik pillugu anisitaasussanut ilaasut takusinnaallutigu, Bodil Svare oqarpoq.
Anisinneqartussat pillugit Kommune Kujalleq suliakkinneqarpoq
Narsami inissiani 89-ini najugaqartut ukioq manna anisitaasinnaasut, februaarip aallartilaanerani paasineqarpoq. Tassa najugaqartut Inissiaatileqatigiiffimmit A/S INI-mit arlaleriarlutik akiligassaqarnertik pillugu allagarsisaraluarlutik akiliineq ajormata, anisitaanissaannik nalunaarfigineqarlutik. Suliarlu tamanna Kommune Kujallermut ingerlateqqinneqarluni.
Anisitaasussanit kikkut kommunimit ikiorserneqarnissaat pillugu suliaq tamassuma kingorna aallartinneqarpoq, maannalu tassa tamanna naammassineqareersimalerluni.
- Inissiaatileqatigiiffimmit A/S INI-mit kikkut anisitaanissaannik nalunaarfigineqarsimasut aqqi paasereerlutigit, suliarput aallartipparput paasiniarlugu kikkut anisitaasussanit 25-iusunit anisitaannginnissaannik ikiuussinnaanerput misissorlutigu. Aamma paasiniarparput kikkut aningaasanik uangutsinnit pissarsisussaagaluartut tunineqarsimannginnersut. Tassalu suliaq tamanna maanna naammassivarput. Oqaatigisariaqarporli anisitaasut inissinneqarallarnissaat Inissiaatileqatigiiffiup A/S INI-p akisussaaffigimmagu, Bodil Svare oqarpoq.
Inissianut akit qaffakkiartorpallaarneri pissutaaneruvoq
Kommune Kujallermi inunnik isumaginninnermut pisortap, Bodil Svarep aamma ilanngullugu oqaatigaa, Inissiaatileqatigiiffiup A/S INI-p inigisanut akiliutigineqartartut ukiuni kingullerni qaffaasarnerisigut akiligassallit amerlatsikkiartuinnavissimasut aamma akiligassat erniaat erniaasalu erniaat ilanngullugit akiligassanngortinneqartarneranni akiitsut amerligaluttuinnavissimasut.