Meeqqanut inuusuttunullu angerlarsimaffissaq Narsami sananeqartussaq piffissami aallajangersimanngitsumi kinguartinneqarallarpoq.
Aningaasat atorneqartussaagaluit Sisimiuni ulloq unnuarlu angerlarsimaffiup, Gertrud Rask Minde-p, allanngortiternissaanut atorneqassasut Naalakkersuisut aalajangersimapput.
Narsami borgmesterip, Kista P. Isaksenip, Atuagaddliutini ullumi saqqummersuni tamanna atuarlugu aatsaat paasivaa.
Tamanna siusinnerusukkut tusarsimanngilaa, Naalakkersuisullu avaqqutsiinnarlutik aalajangertarnerisa tusagassiutitigut tusartarnerat qatsulluinnarpaa.
- Tusagaqarsimanngilluinnarpunga, aatsaat aviisimi atuarpara. Tusagassiutitigut paasitinneqartuaannarsinnaanngilagut, Kista P. Isaksen Radioavisimut oqarpoq.
Narsami meeqqanut inuusuttunullu ulloq unnuarlu angerlarsimaffissaq inunnut arfineq-pingasunut inissaqartitsisussaagaluarpoq.