Narsami avissaartuunneq pisuuteqattaassutigineqarpoq

Narsap borgmesteria Kiista P. Isaksen oqarpoq, Siumukkut Atassutikkunnik suleqateqarnerminnik naliliinerisa takutikkaat, Atassutikkut ataatsimiititaliani sulinerat ilimagisaminnit naammaginarsimanngitsoq taamaattumillu kommunalbestyrelsimi nutaamik inissitsitertariaqarsimallutik. Atassut sinnerlugu kommunalbestyrelsemi ilaasortaq Josef Petersen oqarpoq aningaasaqarnermut ataatsimiititaliamik akisussaaffeqarnissaq assortuussutaasimasoq.

- Aningaasaqarnermut ataatsimiisitaliaq Siumup tigummerusussimavaa, tamannalu naammagisimanngilarput, Josef Petersen oqarpoq.

Kiista P. Isaksen oqarpoq Atassut-ip ataatsimiisitaliani sulinera naammaginarsimanngitsoq, taamaammallu innuttaasunut sullissineq pitsaasoq angorusullugu IA-mik suleqateqalernissaq anguniarneqarsimasoq.

Kiista P. Isaksen naapertorlugu suleqatigiinnerminni politikerinillu allanik naapitsinermi Atassutikkut nipaat tusarusunnartarsimagaluarpoq. Inuussutissarsiornermilu anguniakkanik pingaaruteqartunik anguniagaqarnermi assortorneqartarsimallutik.

Sapaatip-akunneri pingasut matuma siorna Atassutikkut Inuit Ataqatigiinnik Siumukkut tunoqqullugit suleqatissarsiorsimanerarlugit Siumukkut oqaaseqarnerat tupaallaatiginnginnerarpaa tassamigooq Siumukkut namminneq IA-mut suleqatissarsiorlutik saaffigininnissimammata.

Ilanngullugu ilisimatitsissutigaa nutaamik aaqqissuussineq pissusissaq eqqorlugu iliuusaasimanersoq misissuiffigerusukkamiuk.