Narsami annersaasoqarpoq tillinniartoqarlunilu
Nunatsinni tamangajammi sapaatip akunnerata naanera eqqissisimaarfiusimasoq, sinerissami politeeqarfiit taama unnersiorput.
Taamaattorli Narsami sapaatip akunnerata naanera pisoqaalussimammat politiit ulappussimasut, Narsami politeqarfimmi ittuungallartoq Otto Thorsen oqaluttuarpoq.
Narsami tallimanngormat unnuakkut, angummik ilisimanngitsumik imerniartarfiup silataani nalasoqarneranik politiit kalerrinneqarput.
Angut annersarneqarsimalluni kinaa pullattorujussuaq ilisimanngitsorlu napparsimmavimmut unitsikkasuarneqarpoq, qujanartumilli annertunerusumik ajoquserneqarsimanngimmat aqaguani angerlartinneqarsinnaasimalluni.
Angut inuuttoq 17-inik ukiulik annersaasimasutut pasineqarluni tigusarineqarpoq, annersaasimanerlu maanna paasiniaavigineqarpoq, suliarlu naammassippat annersaasimasup pinerlutsaalititsinermut inatsit naapertorlugu pineqaatissinneqarnissi naatsorsuutigisinnaagaa Otto Thorsen oqarpoq.
Narsami imerniartarfik grillbarilu sisamanngornerup tallimanngornerullu akornanni unnuakkut aamma tillinniarfigineqarsimapput, tassani aningaasat 400 koruunit missaat imigassat cigarettillu tillinneqarsimallutik. Tilliniarsimasutut tigusarineqarput angutit marluk 20-inik 23-inillu ukiullit.
Tillinniarsimasut pinerlutsaalititsinermut inatsit naapertorlugu kingusinnerusukkut aamma pineqaatissinneqassasut Otto Thorsen ilisimatitsivoq.
