Narsap kommuneani avatangiisinut kultureqarnermullu tunngasunut suliniut A21, nunat avannarliit avatangiisinut suliniuteqarluartunut nersornaasiuttagaanik nersornaaserneqartussatut siunnersuutigineqarpoq. Taama siunnersuutigineqarnertik assut nuannaarutigigitsik Narsap kommuneani illumi A21-mi pinaveersaartitsinermut siunnersorti Bolethe Stenskov oqarpoq:
- Nuannaarutigisorujussuuarput taamatut toqqagassanut ilangunneqarsimagatta. Bolethe Stenskov oqarpoq, taamalu innersuunneqarnertik suliniutiminnut kinguneqarluassangatippaa.
- Kommunep aningaasalersuinerata saniatigut aningaasaateqarfinnut aamma qinnuteqartarpugut, toqqagassanngortitaasimanerpullu aningaasanik pissarsiniarnitsinnut aamma atorluarsinnaakuttuussavarput.
Narsami suliniut A21 2003-mi aallartippoq, Narsami eqqaavissuup mingutsitsinera aammalu Naalagaaffiit Peqatigiit avatangiisit pillugit nalunaarutaat Agenda 21 aallaavigalugit. Suliniarnermi atoqqiineq aallaaviusoq Bolethe Stenskov oqarpoq.
- Pequtinik atisanik allanillu atoqqiineq suliniarnitsini aallaavigivarput. Aammali peqqissuunissaq pinngortitamillu paarsilluarnissaq innuttaasunut paasititsiniaassutigisarpavut.
- Pisiat igiinnarnagit atoqqinneqarsinnaanerat paasititsiniaallattaassutigiuaannarparput.
- Atoqqiineq aallaavigalugu atisanik ingerlaavaartitsilernikuuvugut. Inuit atisanik aggiussisarput pisariaqartitsisullu aallertarlutik. Maannakkullu pingasorialerpugut aasaanerani sammisaqartitsisarluta meeqqanullu atuanngiffiit nalaanni sammisaqartitsisarluta- peqqinnerulernissaq pinngortitamillu paarsineulernissaq paasititsiniutigalugit. Aamma Eqqaavivuli tusaamaneqartoq ingerlattarparput. Atoqqik aallaavigalu aamma saqqummersitsinerit ingelattarpavut.
Bolethe Stenskov oqarpoq suliniarnertik Narsami meeqqanut inuusuttunullu sunniuteqarluartoq, sumut tamaannga eqqannersuaq atorneerukkiartormat.