Naqqanninnissamut 20 meteriinnanngorpoq

Sermersuarmi qillerinermi pisortap, ilisimatuup Dorthe Dahl-Jensenip, ippassaq nalunaarutigaa sermersuup naqqata tikinnissaanut taamaallaat 20 meterit amigaatigineqartut, taamalu naqqa tikinneqarpat qillerineq kilometerit pingajuata affaa tikillugu itissusilimmut killissasoq.

Taamaattumik sermersuup naqqata ullumikkut angunissaa neriuutigineqarpoq, tassami qillerinerup naammassineranik nalunaaruteqartussat tikeraat assigiinngitsut, ilaatigut nunanit allaneersut ullumi tikeraartussaammata.

Sermeq ullumikkut qaqinneqartussaq ukiunik 150.000-inik pisoqaassuseqarpoq, nunarsuatsinnilu sermersuaqarnerata siulliup akulliullu akornanneersuulluni.

Ulloqeqqata missaani tikeraat timmisartumik Hercules-imik Kangerlussuarmiit aallassapput, silalu apeqqutaatillugu qillerinermit qaqinneqartoq sermersuup naqqaneersoq naammattoorsinnaassallugu.