Nakorsatut atorfiup atorunnaarsinniarneqarnera isornartorsiorneqarpoq

Naalakkersuisut ukiumut 50 millionit koruuninik sipaarniarneranut atatillugu, Ittoqqortoormiini napparsimmavik napparsimmaveeranngortinneqarnissaanut siunnersuut, Kommuneqarfik Sermersuumi borgemesterimit, Asii Chemnitz Narupimit kommunalbestyrelsimilu ilaasortamit, Erling Madsenimit najummannartutut isigineqarpoq. Taakku napparsimmavik sipaarfigineqassappat inuit inuunerinik navianartorsiortitsisinnaasoq oqaatigaat
Allattoq Peter Bye Andersen, Ivik Kristiansen
apriilip 17-at 2015 16:59

- Nakorsatut atorfiup Ittoqqortoormiini atorunnaarsinneqassappat isumaqarpunga akisussaassuseqanngitsuliornerussasoq. Eqqaamasariaqarparput Nunatsinni inoqarfinni tamani Ittoqqortoormiit immaqa avinngarusimanerpaajummat.

Nakorsaarutsinneqassappat immaqa inuit inuuneranik akeqarsinnaalluni. Tamanna akuersaarnartuusorinngilara, Kommuneqarfik Sermersuumi borgmesteri Asii Chemnitz Narup, Inuit Ataqatigiit, oqarpoq.

 

Atassummit isumaqatigineqarpoq

Atassut sinnerlugu kommunalbestyrelsimi ilaasortap, Erling Madsenip borgmesteri isumaqatigaa.

Erling Madsen Ittoqqortuumi borgmesteriunikuuvoq, napparsimmavillu sipaarfigineqassappat tamanna illoqarfimmut sunniinerlorujussuarsinnaasoq taassuma ermumanartoqartippaa.

- Avinngarusimaqaagut. Imaaliallaannaq ukiuunerani kaperlaap nalaani tikinneqarsinnaasanngilagut, massakkullu sapaatip akunneranut ataasiaannarluta attavigineqartarpugut. Nakorsaqanngikkutta arlaannillu piaartumik pisoqassagaluarpat, qanoq inisseqqassaagut, Erling Madsen taama oqartoq, ilanngullugulu oqarluni, siunnersuut piviusunngussappat borgmesteri Asii Chemnitz Narup tamanna pillugu attaviginiarlugu.

 

Asiip Naalakkersuisoq attavigilerpaa

Borgmesterillu peqqissutsimut Naalakkersuisuugallartoq, Martha Lund Olsen attaveqarfigissamaarlugu oqarpoq.

- Peqqissutsimut Naalakkersuisuugallartoq Martha Lund Olsen massakkut allaffigaara, ullumikkullu allakkat apuutissapput. Kommunip Naalakkersuisullu qanoq iliornikkut suleqatigiilluta innuttatta Ittoqqortoormiini peqqinnissakkut pitsaanerpaamik sullinneqarsinnaanerat pillugit oqaloqatigiissutigerusukkakku qaaqquara, Asii Chemnitz Narup oqarpoq ilanngullugulu oqarluni, Namminersorlutik Oqartussat napparsimmaveqarfiup ingerlanneqarneranut kisimik akiliisussaasuusut.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk