Napparsimmaveqarfimmi sulisut ajoqusernerpaasarput

Kalaallit Nunaanni sulillutik ajoqusersimanerminnik nalunaaruteqarsimasut qaammatit siulliit arfineq marluk 176- upput.

Tamanna ukioq kingulleq sulillutik ajutoorsimasut amerlassusaannut naapertuuppoq.

Napparsimmaveqarfiit 48-nik, tassa allanit amerlanerungaartunik, ajutoorsimanernik nalunaaruteqarsimasunik kisitsisaateqarput.

Dronning Ingridip napparsimmavissuani pisortaq, Søren Rendal, oqarpoq, tamanna napparsimmavimmi sulinerup ulorianarneranik pissuteqanngitsoq - sillimaniarnermilli pissuteqarsinnaalluni - assersuutigaalu, napparsimasunik paarsisoq meqqummik kapippat tamanna kisitsisinut qaffassaataasartoq.

-Sillimaniarneq annertooq maani atorneqarpoq.

Peqqissaasut inunnik suliaqartillutik ajutoorneri napparsimanermik kinguneqalinngikkaluartut ilanngullugit nalunaarsortarpagut, Søren Rendal oqarpoq.

Sulilluni ajoqusersimanermi nalunaaruteqarnerit ilagaat napparsimmavimmi uninngasut sulisunik nakuuserfiginnittarneri, sulisut sulinngitsoorsinnaanerannik kinguneqartartut.

-Sulisut silarlutsillugu igalaamut kiggissimasut, inussakkullu napinikut nalunaarsorneqartarputtaaq, Søren Rendal oqarpoq.

Napparsimmavimmi uninngasut sulisunut nakuusertartut napparsimmaveqarfimmit

Danmarkimut aallartinneqartarput. Tamatumunnga atatillugu Dronning Ingridip napparsimmavissuani toqqaannartumik politinut nalunaaruteqarsinnaaneq aaqqiivigineqarnikuuvoq.

Suliffinnittaaq nalilersuisartut suleqatigineqarput. immikkoortukkaat ilaat ingerlallualereersimapput, ilaalli kigaannerusumik malinnaallutik.

Nunanit allanit sivikitsumik paarlattaallutik suliartortut amerlasarput, taama ingerlaaseqarallartilluta ajutoornerit ikiliartunngillat, Dronning Ingridip napparsimmavissuani pisortaq, Søren Rendal naggasiivoq.

Napparsimmaveqarfimmi pisortat sullivinni nakkutilliisartut suleqatiginissaanut pilersaarusiorput.

Peqqinnissaqarfimmi pisortat pilersaarutit ingerlateqqinnissaat malinnaavigissavaat.