Napparsimasut sipaarfigineqartut
Inunnik isumaginninneq pillugu siunnersuisartup tusagassiortullu Tine Bryldip, peqqinnissaq pillugu naalakkersuisoq Arkalo Abelsen Naamminersornerullutik Oqartussat 800.000 koruuninik angalanissanut sipaaruteqarnissamut uparuaaffigaa.
Danmarkimi nunatsinnilumi ilisimaneqarluartoq Tine Bryld ima oqarpoq:
-Naalakkersuisup sulisussaqannginneq pillugu sipaarniuteqartoqarneranik tunngaviliinera paasisinnaanngilluinnarpara, Kalaallit Nunaanniittarsimavunga arlaleriarlunga, eqqarsartaatsimikkut napparsimasut inissinneqartarfiini arlalinni pulaartarsimallunga. Sulisorineqartut taakkunani tikeraartussanik paaqqutarinninnissamut ajukkunnanngilluinnarput, Tine Bryld sanngiitsut sinnerlugit oqaaseqartartutut ilisimaneqarluartoq raadioaviisimut oqarpoq.
Nangipporlu:
-Aap nalunngilara inissamik ajornartorsiortoqartoq, ajornartorsiutilli taassuma aningaasaliiffiginissaa pingaarnerusoraara napparsimasut Kalaallit Nunaanniit aallarartiinnarneranniit, Tine Bryld oqarpoq.
Immikkut inissianik ulloq unnuarlu paaqqinniffiusunik kalaallit eqqarsartaatsimikkut napparsimasut nunatsinni paarineqarluarsinnaanerat Tine Bryldip oqaariartuutigaa.
-Amerlasuut kalaallit eqqarsartaatsimikkut napparsimasut pinerluuteqarsimasullu ersigisarpaat, takuneq ajoramikkit, napparsimasunilli eqqartorneqartunik pitsaanerpaamik paaqqutarinnissinnaasut tassaapput, napparsimasut oqaasiinik kulturiannillu paasinnissinnaasut, tassalu nunaqqataasut.
Soorunamili pikkorissarnermik arlaatigut sulisorineqartussat piukkunnarsartariaqarput, psykiaterisut imaluunniit psykologisut ilinniarluaqqissaarsimasuunissaq paaqqutarinninnissamut pisariaqanngilaq, Tine Bryld oqarpoq.
Uani eqqartorneqartoq tassaavoq pinerluuteqarsimasut eqqarsartaatsimikkut napparsimasut ukiumut ataasiarlutik nunatsinnut tikeraarsinnaanerata sipaarutigineqarnera.
Inuit eqqarsartaatsimikkut napparsimasut 13-it maanna napparsimavimmi matoqqasumi inissinneqarsimapput. Taakkunannga marluk nunatsinnut tikeraarnissamut naleqqutilersimasutut nalilerneqarsimapput.
-Inuit taakkorpiaat ulorianarsinnaanerat sulisutsinnit naliliiffigineqaqqaartarpoq. Uloriananngitsutullu aatsaat nalilerneqaraangamik angalanissmut piukkunnartutut oqaatigineqarsinnaalersarput, immikkoortortami pisortaasoq Villads Villads raatiuaviisimut oqarpoq.
Taamaammat Tine Bryldip peqqinnissamut naalakkersuisumut sipaarniarnissamik aalajangiineq naliliiffigeqquaa oqarluni.
-Inuit ikittoralaannguit uani eqqartorneqarput, katsorsartereersimapput, sanngiillutik. Politikerit sanngiitsunik paaqqutarinninnissamik siuttuusariaqarput, Tine Bryld oqarpoq
Arkalo Abelsen raadiuaviisimut oqarpoq, napparsimasut nunatsinnut tikeraartarnerannik sipaarniarnissaq politikikkut anguniagaanngilluinnartoq. Aningaasat soorunami nassaarineqassapput, napparsimavimmi Risskovimiittumi napparsimasunik angalanissamut piukkunnartunik naliliisoqarsimappat, Arkalo Abelsen oqarpoq.
