Napparsimasut qimaasarnerat unitsinniarpaat
Kalaallit arfinillit Risskovimi Århusimiittumi napparsimmaviup eqqarsartaatsimikkut napparsimasunut immikkortortaqarfianiit aggusti aallartilaartoq qimaapput.
Kalaallit inuusuttut marluk imaannaanngitsumik pinerluuteqarsimanertik pillugu inissinneqarsimasut Risskovimi eqqarsartaatsimikkut napparsimasunut napparsimmavimmiit ippassaq unnukkut qimaapput. Taamaalillutik Danmarkimi nunat immikkoortortaat peqqinnissamullu ministeri Bertel Haarder naammagittaannarsinnaajunnaarput.
Eqqarsartaatsimikkut napparsimasunut napparsimmavinni immikkoortortaqarfinni napparsimasut ulorianaateqarsinnaasut ulorianaateqanngitsullu qimaasarnerat unitsinniarlugu immikkoortinneqartarnissaat taakkua piumasaraat.
Maanna tassa aaqqiissutissamik nassaartoqartariaqalerpoq, Danmarkimi nunat immikkoortuini siulittaasup tullia Carl Holst oqarpoq.
Napparsimasut qanoq katitigaaneranni eqqarsartaatsimikkut napparsimasut siniffiini allannguuteqartoqarsimavoq. Tamanna paasiniartariaqarparput imaannaanngitsumik pinerluuteqarsimasut aammalu eqqarsartaatsimikkut napparsimasut ulorianaatillit qimaannginnissaasa qulakkeernissaat siunertaralugu, Carl Holst oqarpoq.
Peqqinnissamut ministerip Bertel Haarderip Risskovimi eqqarsartaatsimikkut napparsimasunut napparsimmavik ullumi pulaarpaa.
Tamatumanilu peqqinnissamut ministerip ilaatigut inatsisit arlaatigut allanngortinneqarsinnaanersut paasiniarlugu, taamaalilluni parnaarussat ulorianaatillit qimaanaveersaartinnissaat ajornannginnerulissammat.
Danmarkimi nunat immikkoortuisa maanna politikerit, pinerluttunik isumaginnittut immikkullu paasisimasallit katersornialerpaat, taamaalilluni eqqarsartaatsimikkut napparsimasut eqqartuunneqarsimasut atugaat misissoqqissaarneqassammata.
Imaanngitsoq Danmarkimi nunat immikkoortui naalagarsiortinniarnerat siunertarigipput, tassami uagut akisussaagatta, kisianniliuna ataatsimoortumik aaqqiissuteqarnissaq siunertarigipput, Carl Holst oqarpoq.
Carl Holst isumaqarpoq eqqarsartaatsimikkut napparsimasunik immikkoortitsineq aaqqiissutissatut periarfissaasinnaasoq. Eqqarsartaatsimikkut napparsimasut pinerluttuliorsimasarput ataatsimoornermullu ulorianartorsiortitsisarlutik, taavalu eqeersimaarnerusumik isumannaallisaasariaqarneq isummerfigisariaqarparput imaalillugu, napparsimasut ulorianaatillit aninissaannut annertunerusumik isumannaallisaavigalugit, Carl Holst oqarpoq.
Tamatumunnga Bertel Haarder isumaqataavoq isumannaallisaanerullu annertusinissaa aningaasat eqqarsaatigalugit isumagineqarsinnaavoq.
Tassami eqqarsartaatsimikkut napparsimasunut napparsimmavinni atortulersuutinut atugassatut 100 mio. kr.-it pigineqarput nalinginnaasumillu 260 mio. kr.-it eqqarsartaatsimikkut napparsimasunut, taamaalilluni akissaqartoqartariaqaraluarpoq, Bertel Haarder oqarpoq.
Angutit qimaasimasut pissanganartorsiornanngitsumik ulloqeqqata siornagut politiinit tigusarineqarput.
