Napparsimasut paaqqutariuagassat Islandiliartinneqartalissapput
Tamatumalu kingunerissavaa angallassinerup sivikinnerulerneranik millioninillu sipaaruteqarnermik kinguneqassaaq. Oqalutseqarnermut, timmisartumik angallassinermut najugaqarnermullu piumasaqaatinik nutaanik piumasaqaateqarfiulissalluni, Peqqinnissamut Naalakkersuisoqarfimmi pisortaq Ann Birkekær Kjeldsen oqarpoq.
Islandiliartinneqartartussat´paaqqutariuagassaanerussapput.
- Naalungiarsuit inorlutik inuusut anersaartuuteqartillugit paaqqutariuagassat, aammalu inersimasut tartuluttut uummatiluttullu inuilluunniit inuit misigisimasaminnik kingunerlutsitsisut Islandiliartinneqartassapput.
Napparsimasut paaqqutariuagassat Kangerlussuaq aqqusaarlugu Danmarkimut timmisartuunneqartaraluarput, aqqutaanili uneqattaarpallaartarnerat pitsaasuunani, taamaattumik Nuummiit Islandimut toqqaannartumik timmisartuunneqartalerunik pitsaanerulissaaq, Ann Birkekær Kjeldsen oqarpoq.
Apeqqutaalerporli Islandimi soorlu oqalutseqartarneq qanoq isumagineqartassanersoq.
- Unammillernartua uaniippoq napparsimasunik Danmarkimi aaqqissuussinerput, napparsimasunut angerlarsimaffeqarpugut, nutserisoqarpugut napparsimasullu Danmarkimi atugaasa pitsaanerpaajunissaannut ataqatigiissaarisoqarluta, taamatullu aaqqissuussineq Islandimi piginngilarput, tamannaavorlu Islandimiunik oqaloqatiginnissutigisassarput.
Nunani allani napparsimasunik katsorsaanermut aningaasartuutit ukiuni kingullerni amerleriapiloorsimapput. Nunani allani ukiut arfiniliinnaat matuma siornagut suliaritinnissamut 80 millionit koruunit immikkoortinneqartarput, ukiumulli tullermut aningaasanut inatsisissatut siunnersuummi 104 millionit koruuningajaat immikkoortinneqarlutik.
Ukiormanna napparsimasunik angallassinerinnarnut 68 millionit koruuningajaat immikkoortinneqarput, Ann Birkekær Kjeldsen oqarpoq.
Napparsimasumik Danmarkimut angallassineq ataaseq agguaqatigiissillugu 400.000 koruuninik akeqarpoq, Islandimullu timmisartuussisoqartalerpat taakkua immaqa affaannanngortissinneqarsinnaalissapput.
Peqqinnissamut Naalakkersuisoq naalakkersuisoqarfinnilu assigiinngitsuni pisortat peqqinnissaqarfimmilu sulisut qaammatip tulliani kalaallit napparsimasut katsorsarneqartarnissaat oqaluuseriniarlugu Islandimukassapput. Pilersaarutillu tamarmik malinneqarpata napparsimasut siulliit decembarimi Islandiliarsinnaanngussapput.
