Assi: Naalakkersuisut

Napparsimasut oqaaseqartartoqalernissaannut atsiornerit Naalakkersuisunut tunniunneqartut

Naalakkersuisuusimasoq, Suka K. Frederiksen napparsimasut oqaaseqartartuannik pilersitsiniarnermut atsiornernik katersuisinermik aallartitsivoq. Taassuma peerunnerata kingornatigut suliaq ilaqutaanit nanginneqarpoq. Atsiornerillu maanna tunniunneqarlutik.

Peqqissutsimut naalakkersuisup, Anna Wangenheimip napparsimasut oqaaseqartartuannik pilersitsinissamut atsiornerit sapaatip-akunnerata siuliani tiguai.

Nunamut imminermut naalakkersuisuusimasup, Suka K. Frederiksenip oqaaseqartartumik pilersitsisoqarnissaanut suliniut aallartippaa. Taanna sivisuumik napparsimareerluni juulimi 55-inik ukioqarluni qimaguppoq.

- Napparsimasut oqaaseqartartoqalernissaat ujartorparput, napparsimasut sinnerlugit oqaaseqartarsinnaasumik, Suka K. Frederiksen Sermitsiaq.AG-mut siorna apriilimi oqarpoq.

Suka K. Frederiksenip ilaqutaata tassa uiata, Sofus Frederiskenip, paniata Katti Frederiskenip erneratalu Ingo Frederiksenip atsiornernik katersinerit tunniunneqarnissaannut suliassap naammassinissaa nangippaat.

Taakku Suka K. Frederiksenip atsiornerit katersai peqqissutsimut naalakkersuisumut, Anna Wangenheimimut (D) tunniuppaat.

- Junimi Suka K. Frederiksen-imit saaffigineqarpunga atsiornernik politikkikkut oqartussaasunut tunniussinissamik kissaateqarluni. Saaffiginneqqammerneratalu kingunitsianngua qimagunnera tunngavigalugu atsiornernik tunniussinissani angumerinngitsoorpaa.

- Nalunngilara Suka napparsimasut pitsaasumik atugaqarnissaat annertuumik sulissuteqarfigisimagaa, anguniagaq tamanna ataatsimoorussaraarput.

Anna Wangenheim tusagassiuutinut nalunaarummi oqarpoq.

Napparsimasut oqaaseqartartuat napparsimasut atugassarisaannik paasisaqartitsisinnaasoq

Suka K. Frederiksenip paniata, Katti Frederiksenip atsiornernik katersineq Naalakkersuisunit tusaaniarneqarumaartoq neriuutigaa.

Taassuma arnaata nuna tamakkerlugu atsiornerit 1609-t katersorlugit angumerai.

- FN-ip inuit pisinnaatitaaffii pillugit isumaqatigiissutaani allaqqavoq, kinaluunniit napparsimasoq toqqissilluni ikiorserneqarnissamik katsorsarneqarnissamillu pisinnaatitaaffeqartoq. Kisianni pissutsit nunatsinni massakkut imaapput, napparsimasoq nammineerluni ajoraluartumik piffissaq nukinillu atorlugit, pitsaasumik aamma toqqissisimasumik ataqatigiissakkamik sullinneqarnissaminnik ujartuisariaqartarpoq.

- Napparsimasunik oqaaseqartartussaanik pilersitsinissaq pisariaqarpoq – nammineq napparsimasoq isaaninngaanniit pissutsit taakku naalakkersuisoqarfik peqqinnissaqarfikkullu pitsangorsaanissaminnut aamma atorsinnaassagamikkut.

Neriuffiit Kattuffiata nunatsinni inuit 170-it missaanniittut nappaassuarmik kræftimik ukiumut eqqugaasartut naatsorsorneqarnerat siorna takutippaa. Tassa imaappoq sapaatip-akunneranut inuit pingasut eqqugaasarnerisa tamanna assigaa.

Katti Frederiksenip Naalakkersuisut maanna iliuuseqartussanngorsorai.

Assi: Suka K. Frederiksen.

- Inuinnaalluni immaqa qanoq iliuuseqarsinnaaneq killeqartutut issinnaasarpoq, taamaattumik uku atsiornerit pingaaruteqartorujussuupput qinikkanut tiguneqarluarnissaat. Taakku timitaliisinnaapput, tassami pissaaneq tigummivaat qanoq iliuuseqartoqaqqinnissamut aamma alloriarfik tullissaanut iliuuseqartoqarnissaanut.

Peqqissutsimut naalakkersuisup, Anna Wangenheimip (D) atsiornernik katersinerit tiguneranut atatillugu atsiornerit tusaatissatut tiguneqartut oqaatigaa.

Taassumalu napparsimasunut pissutsitt pitsaanerulersinneqarnissaanut oqariartuutit napparsimasut katsorsarneqartarnerata pitsanngorsarneqarneranut tassanilu siusinaartumik suliniuteqartarnerup pingaartuutinneqarneranut suliaqarnermut ilanngunneqassasut neriorsuutigigaa, tusagassiuutinut nalunaarummi allassimavoq.

Katti eqqissiallattoq

Kræftimik akiuineriarmit 2018-imi misissuinermut atatillugu nunatsinni kræftimik napparsimallutik toqquteqartartut nunanit avannarlernit allanit amerlanerungaatsiartut paasineqarpoq.

Katti Frederiksen atsiornernik katersuinerup tunniunneqarnerani aamma toqqissiallappoq. Taassumami arnaata, Suka K. Frederiksenip atsiornerit Naalakkersuisunut tunniunneqarnissaat isumaqatigiissutigisimagaluarpaa. Tamannali ajoraluartumik angumerinngilaa.

- Pissusissamisoortutut isigiinnarpara nanginnissaa, eqqissiallannarpoq taakku atsiornerit tunniunneqarmata.

- Soorunami uggornartorujussuuvoq nammineerluni apuutinnginnamigit, nammineq oqaatini atorlugit, tunngavilersuutigisani, misilittakkani ilisimasanilu atorlugit qanoq pitsaatigisumik ingerlassimasinnaagaluaraat takorloorsinnaagakku. Kisianni soorunami uagut toqqissiallappugut atsiornerit apuuffissanut apuussinnaagatsigit.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat