Napparsimasut nunatsinnut angalaqqusaanngitsut

Inunnik isumaginninnermik siunnersuisartup tusagassiortullu, Tine Bryld-ip, Peqqissutsimut Avatangiisinullu naalakkersuisoq, Arkalo Abelsen, uparuarpaa.

Tine Bryld isumaqarpoq Namminersornerullutik Oqartussat 800.000 koruuninik uninngasut angalanissaannut atugassanik sipaarniarnerat sanngiitsunut napparsimasunullu kusananngitsuliornerusoq.

Pinerluuteqarsimasut eqqarsartaatsimikkut napparsimasunut immikkoortortaqarfimmut matoqqasumut Århus Universitetshospitalimut piffissami killiligaanngitsumi inissitaasut, sipaarniarnikkut eqqugaapput.

Tine Bryld sanngiitsunik illersuisartutut naluneqanngilluartoq kamaammeqqavoq:

- Isumaga malillugu – suliamut atatillugu pissutissaqanngilluinnarpoq – eqqarsartaatsimikkut napparsimasut pinerluuteqarsimasullu, angerlalaarnissaannik sipaarniarfigissallugit, tamanna ujajaanertut taasariaqarpoq, pisorlu sipaarniarnissamik aalajangiisartut inunnut napparsimasunut isiginnittaasiannik ersersitsiinnarpoq, uffalu taakkuusut inuttut pisinnaatitaaffiariikkat, Tine Bryld oqarpoq.

Napparsimmaviup napparsimasut naliliiffigineqartarnerat ima oqaatigaa:

- Napparsimasut ukiut marlussuit uninngareersut katsorsartereersullu angalanissaat maani atorfilittaniit naliliiffigineqartarpoq. Angalasinnaasutullu nalileraangatsigit nalinnginnaavoq atorfillit angalanermut ilaatinneqartarnerat, eqqarsartaatsimikkut napparsimasut Jyllandip qeqqani immikkoortortaanni pisortaq, Villads Villadsen, Radioaviisimut oqarpoq.

Kalaallit agguaqatigiissillugu 13-it eqqarsartaatsimikkut napparsimasut uninngavianni matoqqasumi uninngasuutigineqartarput.