Napparsimasut akiliisinneqartalernissaat oqallisigerusuppaa
Nappaatit naalakkersuisut siulittaasuata eqqarsaatigisai tassaapput nappaatit inuunermi pissusilersuutinik tunngaveqartut naartuersinnerillu. Tamanna Asii Chemnitz Narupip apeqquteqaataanut akissuteqaammi takuneqarsinnaavoq. Asii Chemnitz Narupip nappaatip suussusersineqarnera apeqqutaatillugu immikkoortitsinissaq akerleraa.
Hans Enoksen akissuteqaammini allappoq siunertarigini innutaasunit pisortat ajornartorsiutinik tamanik aaqqiisussatut isigineqartarnerata oqallisigineqalernissaa.
- Nammineq pisuussutigalugu nappaatit inuiaqatigiinni nutaaliaasuni ajornartorsiutaanerat alliartuinnarpoq. Aamma isumaqarpunga assersuutigalugu naartuersittarnerpassuit inuusuttut akornanni namminermut akisussaassuseqannginnermik pissuteqartartut.
- Nalunngilara oqallittarnerit taamaattut amerlaqisutigut misigissutsinik attuisarmata aaqqiissutissanillu pisariitsunik uagut tigoriaannaateqassanata. Neriuutigaarali oqallinnikkut nammineq pisuussutigalugu nappaataalersartut amerliartornerat, soorlu naartuersittarneq ilorraap tungaanut saatinneqarsinnaassasoq, Hans Enoksen akissummini ilaatigut allappoq.
Naalakkersuisut siulittaasuata oqallittoqareertinnagu qanoq akiliuteqartoqartassanersoq oqaatigerusunngilaa.
