Napparsimasut 500-t tartulertinnissamut utaqqipput
Danmarkimi innuttaasut amerlanerussuteqarluartut timip pisataasa ilaannik amigaateqarnerujussuup iliuuseqarfiginissaanut piareersimapput.
Inunnik isumasiuinerit marluk ersersippaat 60 aamma 70 procentit pineqartoq pillugu inatsisip allanngortinnissaanut isumaqataasut, taamaalilluni inuit 18-inik ukioqalereersut, timip pisataasa ilaannik tunniussisussanngorlugit, tassa taamatut aaqqissuussinermut ilaajumani nalunaarsimanngikkaangamik. Tamanna akuersisutut naatsorsuutigineqarnermik taaneqartarpoq.
Aammami timip pisataasa ilaat amigaatigineqaqaat. Soorlu maannakkut napparsimasut 500-t tartulertinnissaminnik utaqqipput. Utaqqinerallu sivisusinnaavoq, tassami Folketingimi politikerit apeqqut pillugu avissaartuussimapput.
Folketingimi peqqinnissaq pillugu oqaaseqartartut inuit amerlanerusut timip pisataanik qanoq tunniussisinnaassanersut isumaqatigiinngissutaavoq.
Folketingimi peqqinnissaq pillugu ataatsimiititaliap siulittaasuata Birthe Skourupip Dansk Folkepartimeersup akuersisutut naatsorsuutigineqarnissaq aqqutissaasutut isiginngilaa.
- Isumaqarpunga inuit qulaanniit pisussaaffilersorsinnaanngikkivut, naluarpummi taamaaliorusunnersut, Birthe Skourup oqarpoq.
Aamma Konservativinit timip pisataasa ilaannik tunniussisussatut inunngortarnersugut apeqquserneqarpoq.
- Apeqqut una pingaaruteqarluinnartuummat ikinnerussuteqaraluartulluunniit isiginiarneqartariaqarput, taamaattumik isumaqarpunga taamatut aaqqissuussinissamut suli piareersimanngitsugut, naalakkersuinikkut oqaaseqartartoq Pia Christmas Møller oqarpoq.
Kisianni nutaamik aqqutissarsiornissaq pisariaqarsinnaavoq akuersisutullu naatsorsuutigineqarnissamik aaqqissuussineq eqqullugu, soorlu Europami nunani arlalinni tamanna eqqunneqareersoq.
- Spaniami akuersisutut naatsorsuutigineqarneq eqqunneqareerpoq taamalu timip pisataasa ilaannik amigaateqartoqarani, ileqqorissaarneq pillugu Siunnersuisoqatigiit siulittaasuat Ole Hartling oqarpoq.
- Timip pisataasa ilaannik maannakkut ima amigaateqartigaagut nutaamik eqqarsartariaqalerluta, periaaseq Danmarkimi nutaajuvoq, kisianni nunani allani eqqunneqareerpoq aamma periarfissaavoq, Ole Hartling oqarpoq.
Folketingimi politikerit ilaasa akuersisutut naatsorsuutigineqarnissamik aaqqissuussinissaq ajorinngilaat.
- Isumaqarpunga politikerit siuttuullutik oqaatigisariaqaraat akuersisutut naatsorsuutigineqarneq Danmarkimi eqqutissagipput, Venstret peqqinnissaq pillugu oqaaseqartartuat Jørgen Vinther oqarpoq.
Aamma SF-it isumaqarput aaqqissuussineq piaarnerpaamik atuutsilertariaqartoq.
- Isumaqarpunga piaarnerpaamik eqqunneqartariaqartoq, tassami nalunngilarput tartuluttut utaqqitillutik napparsimaleraluttuinnartartut toqusarlutillu. Sukkanerusumik aaqqissuussineq eqqukkutsigu inuit amerlanerit inuunerat annaassinnaavarput, SF-imeersoq Kamal Qureshi oqarpoq.
